व्यापारीलाई प्रचण्डले भने- तपाईँहरू सबै अख्तियारको फन्दामा पर्ने खतरा थियो, बच्नुभयो

काठमाडौँ- प्रमुख प्रतिपक्षी नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले निजी क्षेत्रमा अख्तियार दुरुपयोग अनुसन्धान आयोगलाई प्रवेश गर्न नदिने वातावरण बनाएको बताएका छन्।

शनिबार काठमाडौँमा नेपाल राष्ट्रिय व्यवसायी महासंघको ७औँ वार्षिक साधरणसभा तथा तेस्रो राष्ट्रिय महाधिवेशनलाई सम्बोधन गर्दै उनले यस्तो बताएका हुन्।

‘निजी क्षेत्रका साना व्यवसायीहरुको हिसाबकिताब पनि सबै अख्यितारले हेर्ने भन्ने कुरा आइराखेको थियो। तपाईँहरु सबै अख्तियारको फन्दामा पर्ने खतरा पैदा भएको थियो।’

निजी क्षेत्रमा अख्तियार छिराइए सबै बर्बाद हुने भन्दै आफूहरुले त्यसलाई रोकेको प्रचण्डको भनाइ थियो।

‘हामी सबैले निजी क्षेत्रमा अख्तियार छिराइयो भने गयो, सबै बर्बाद हुन्छ भनेर त्यसलाई नआउने बनाएका छौं,’ उनले भने। व्यवसायीहरु बेचेको भन्दै बधाई समेत दिए।

‘निजी क्षेत्रमा अख्तियार आउन नदिने भयौं हामीले। हामी सबै मिलेर त्यो वातावरण बन्यो। यसका लागि तपाईंहरुलाई बधाई भन्न चाहान्छु, बच्नुभयो,’ उनले भने।