‘कर्जा उठाउने बेला बैंकका कर्मचारीमाथि आक्रमण हुन्छ’

काठमाडौँ- नेपालको अर्थतन्त्र अझै पनि संकटपूण र तनावपूर्ण अवस्थामा रहेको सरोकारवालाहरुले बताएका छन्। नेपाल बैंकर्स संघले मंगलबार काठमाडौँमा आयोजना गरेको पत्रकार सम्मेलनमा बोल्ने अधिकांश वक्ताहरुले अर्थतन्त्रमा समस्यामै रहेको औँल्याएका हुन्।

नेपाल बैंकर्स संघका प्रमुख कार्यकारी अधिकृत अनिल शर्माले नेपाल कुल गार्हस्थ्य उत्पादन (जीडीपी) ग्रोथको हिसाबले बलियो रहे पनि अर्थतन्त्रमा भने धेरै परिवर्तन हुन नसक्ने बताए।

‘यस वर्ष र आगामी दुई वर्षमा विश्वव्यापी रुपमा धेरै परिवर्तनको अपेक्षा गर्न सकिदैन,’ उनले भने, ‘नेपालको सन्दर्भमा हेर्दा अलिकति बलियो जस्तो देखिन्छ। विश्वव्यापी रुपमा समस्याहरु भएपनि नेपालमा जीडीपी ग्रोथको लागि अलिकति ठाँउ छ।’

यसको साथै, उनले पछिल्लो समय पर्यटन क्षेत्रमा केही सुधार भएको, आयात निर्यातको क्षेत्र पनि सही दिशातर्फ गइरहेको बताए।

सोही क्रममा नेपाल बैंकर्स संघका अध्यक्षमा सन्तोष कोइरालाले अर्थतन्त्र अहिले तनावपूर्ण अवस्थामा नै रहेको औंल्याए। उनले भन्दै लोनको ग्रोथ सोचे अनुसारको हुन नसकेको बताए।

कोइरालाले बैंकहरुले कर्जा रिकभरी (उठाउने) क्रममा कर्मचारीहरूले भोग्नुपरेको हिंसा र आक्रमणको विषयमा सरकारको गम्भीर ध्यानाकर्षण गराएको जानकारी दिए। उनले बैंकका कर्मचारीहरुको सुरक्षाको ग्यारेन्टीका लागि सरकारले तत्काल कदम चाल्नुपर्ने माग गरे।

कर्जा रिकभरीका क्रममा विभिन्न बाधाहरुको सामना गर्नुपरेको कोइरालाको भनाइ थियो। विशेष गरी स्थानीय तहको सहयोगको अभावले बैंकहरुलाई धितो लिलाम गर्न र बेच्न समस्या भइरहेको उनले बताए।

उनले लोन उठाउन जाने क्रममा कर्मचारीहरुमाथि हातपात हुने गरेको गुनासो गरे। ‘अर्थतन्त्र अहिले तनावपूर्ण अवस्थामा छ। लोनको ग्रोथ सोचे अनुसारको हुन सकेको छैन्। डिमान्ड राम्रो छैन। विभिन्न ठाँउमा लोन उठाउन जाने क्रममा कर्मचारी साथीहरुलाई विभिन्न खालको हमलाहरु हुने गरेको छ,’ उनले भने, ‘यस बारेमा सरकारसँग पनि कुरा भएको छ। सुरक्षाको बारेमा पनि कुरा उठाइरहेका छौं। नकारात्मक कुराहरु धेरै आइरहेको समयमा सकरात्मक पक्षहरुलाई पनि महत्व दिएर अगाडी बढ्न आग्रह गर्न चाहन्छु।’

त्यस्तै संघका उपाध्यक्षसमेत रहेका ग्लोबल आईएमई बैंकका प्रमुख कार्यकारी अधिकृत सुरेन्द्र रेग्मीले ऋणी र बैंकबीचको सुमधुर सम्बन्ध भएको र ऋणीलाई विश्वास गरेर नै ऋण लगानी गर्ने बताए।