वित्तीय सुशासन जोखिम मूल्यांकनमा मेलम्चीलाई पहिलो नम्बर

काठमाडौं– स्थानीय तह वित्तीय सुशासन जोखिम मूल्यांकनमा सिन्धुपाल्चोकको मेलम्ची नगरपालिका पहिलो भएको छ। मेलम्चीले आर्थिक वर्ष २०७८\७९ को प्रारम्भिक नतिजामा ८९.५ प्रतिशत अंक प्राप्त गर्दै जिल्लाभित्र पहिलो भएको हो।

मेलम्चीले योजना बजेट तथा कार्यक्रम व्यवस्थापनमा ९२.८६, कार्यान्वयन क्षमता तथा व्यवस्थापन ९७.९३, लेखांकन तथा प्रतिवेदनमा शतप्रतिशत, अनुगमन मूल्यांकन तथा लेखा परीक्षणमा ८१.२५ र राजस्व व्यवस्थापनमा ८५.२९ प्राप्त गरेको जनाइएको छ। जिल्ला समन्वय समितिले मूल्यांकन गरी अन्तिम नतिजा प्रकाशन गरेको थियो।

मूल्यांकनअनुसार भोटेकोसी गाउँपालिकाले ६५ अंक, जुगल गाउँपालिकाले ५० अंक, पाँचपाखरी थाङ्पाल गाउँपालिकाले ५४ अंक, हेलम्बु गाउँपालिकाले ४१.५ अंक, चौतारा साँगाचोकगढी नगरपालिकाले ६६ अंक पाएका छन्।

यस्तै, बलेफी गाउँपालिकाले ६०.५ अंक, बाह्रबिसे नगरपालिकाले ६४ अंक, त्रिपुरासुन्दरी गाउँपालिकाले ६१.५ अंक, लिसंखुपाखर गाउँपालिकाले ५४.५ अंक र सुनकोशी गाउँपालिकाले ४२.५ अंक प्राप्त गरेका छन्। मेलम्चीले आर्थिक वर्ष २०७७\७८ मा पनि ७१.५ अंक प्राप्त गर्दै पहिलो भएको थियो।

मेलम्चीले स्थानीय तह संस्थागत क्षमता स्वमूल्यांकनमा ८६ प्रतिशत अंक दाबी गरेको छ। स्वमूल्यांकनको विषय क्षेत्रको समग्र स्थितिमा ९२.८६ प्रतिशत, प्रक्रियागत स्थितिमा ८३.८२, परिणात्मक स्थितिमा ८४.४४ प्रतिशत अंक दाबी गरेको छ।

अब संघीय मामिला तथा सामान्य प्रशासन मन्त्रालयले यसको गुणस्तर परीक्षण गरी नगरपालिकाको अन्तिम नतिजा प्राप्त हुने मेलम्चीको सूचना प्रविधि शाखा प्रमुख अर्पना श्रेष्ठले जानकारी दिइन्।

प्रमुख प्रशासकीय अधिकृत अमृतकुमार धितालले आगामी आवमा दुईटै मूल्यांकनमा ९० प्रतिशतभन्दा माथि अंक आउने गरी काम गर्ने लक्ष्य लिइएको बताए। नगरपालिकाको मूल्यांकनपछि नगर प्रमुख आइतमान तामाङ, उपप्रमुख उमा प्रधानले आगामी वर्षमा पनि स्थानीय तहमा प्रथम हुने गरी काम गर्ने प्रतिबद्धता जनाए।

नगरपालिका लगातार दोस्रोपटक जिल्लामै प्रथम भएको हो। आव २०७८÷७९ मा पनि मेलम्ची स्थानीय तह संस्थागत स्वमूल्यांकनमा प्रथम भएको थियो।