बजेट खर्चमा आरजु अब्बल

काठमाडौँ- चालु आर्थिक वर्ष २०८१/८२ को पहिलो ६ महिनामा सबैभन्दा बढी बजेट खर्च गर्ने मन्त्रालयको सूचीमा परराष्ट्र मन्त्रालय शीर्ष स्थानमा परेको छ।

अर्थमन्त्री विष्णु पौडेलले सार्वजनिक गरेको चालू आर्थिक वर्षको पहिलो ६ महिनाको अर्धवार्षिक प्रतिवेदनअनुसार नेपाली कांग्रेसकी नेतृ डा आरजु राणा देउवाको नेतृत्वमा रहेको परराष्ट्रले बाँकी मन्त्रालयको तुलनामा बढी बजेट खर्च गरेकी हुन्।

परराष्ट्र मन्त्रालयका लागि चालू आवमा ६ अर्ब ७९ करोड रुपैयाँ विनियोजन गरिएको थियो। उक्त रकममध्ये ३ अर्ब ४३ करोड रुपैयाँ खर्च भएको छ। चालु आवमा विनियोजन भएको रकममध्ये मन्त्रालयले ५०.६४ प्रतिशत खर्च गरेको अर्थ मन्त्रालयले जानकारी दिएको हो। आर्थिक वर्षको ५० प्रतिशत समय व्यतित हुँदा आरजुले ५० प्रतिशतभन्दा बढी रकम खर्च गरेर आफ्नो मन्त्रालयलाई शीर्ष स्थानमा पारेकी हुन्।

बजेट खर्च गर्ने मन्त्रालयको दोस्रो नम्बरको सूचीमा रक्षा मन्त्रालय छ। रक्षाले यो अवधिमा ४६.३९ प्रतिशत रुपैयाँ खर्च गरेको पनि पनि तथ्यांकले देखाएको छ। यो मन्त्रालयको नेतृत्वमा मानवीर राई छन्।

यो आर्थिक वर्षमा सबैभन्दा कम खर्च गर्ने मन्त्रालयको सूचीमा उद्योग वाणिज्य तथा आपूर्ति मन्त्रालय छ। उद्योग मन्त्रालयले चालू आर्थिक वर्षमा विनियोजित बजेट ८ अर्ब रुपैयाँको ७ प्रतिशत मात्रै खर्च गरेको छ। मन्त्रालयले जम्मा ६१ करोड रुपैयाँ मात्रै खर्च गर्न सकेको छ। यो मन्त्रालयको नेतृत्व एमालेका नेता दामोदर भण्डारीले गरिरहेका छन्।

समीक्षा अवधिमा नेपाल सरकारको स्रोततर्फ ६ खर्ब १८ अर्ब ५१ करोड रूपैयाँ खर्च भएको छ। जुन गत आर्थिक वर्षको खर्चको तुलनामा १५.८६ प्रतिशतले बढी हो। वैदेशिक अनुदानतर्फ ७ अर्ब ७१ खर्च भएको छ। यस्तो खर्च गत आर्थिक वर्षको तुलनामा ४२.७९ प्रतिशतले बढी हो।

वैदेशिक ऋणतर्फ ४१ अर्ब ३७ करोड रुपैयाँ खर्च भएको र यो गत वर्षको तुलनामा ४६.७५ प्रतिशतले बढी भएको अर्थमन्त्री पौडेलले जानकारी दिएका छन्।

यस्तो छ बजेट खर्चको प्रगति विवरण