एसईई ‘फेजआउट’ गर्न संसदीय उपसमितिले जुटायो सहमति

काठमाडौँ- प्रतिनिधि सभा अन्तर्गत शिक्षा, स्वास्थ्य तथा प्रविधि समितिले बनाएको उपसमितिले माध्यमिक शिक्षा परीक्षा (एसईई)नगर्ने सहमति जुटाएको छ। विद्यालय शिक्षा विधेयकमाथिको दफावार छलफलमा अबदेखि एसईई नगर्ने सहमति जुटाइएको हो।

‘आधारभूत तहको अन्तिम परीक्षा स्थानीय तहले गर्ने र माध्यमिक तहको अन्तिम परीक्षा राष्ट्रिय परीक्षा बोर्डले गर्ने सहमति जुटेको छ,’ उपसमिति स्रोतले भन्यो, ‘एसईई नगर्ने सहमति जुटेको छ।’

विद्यालय तहको अन्तिम परीक्षा १२ कक्षाको हुने भएकाले १० को परीक्षा स्कुलस्तरमै गर्न सहमति जुटेको हो।

विधेयकमाथि कतिपय सांसदले एसईई प्रदेशमा हस्तान्तरण गर्न संशोधन हालेका थिए। प्रदेशलाई दिने विषयमा पनि उपसमितिमा छलफल भएको थियो। तर, एसईई नराख्न उपसमितिमा सहमति जुटेको हो।

ईसीडीलाई २ वर्षको बनाउने पनि सहमति जुटेको छ। सबै विषयमा टुंगो लगाएर फुल समितिमा पेस गर्ने उपसमितिको तयारी छ। विधेयकमाथि उपसमितिमा लगातार छलफल भइरहेको छ।

शिक्षकहरूले ऐन जारी गर्न माग गर्दै आन्दोलन थालेपछि उपसमितिले छलफल गरिरहेको हो। सरकार र शिक्षक महासंघबीच वार्ता भए पनि सहमति जुटेको छैन। गत २० चैतदेखि शिक्षकहरूले सडक आन्दोलन गरिरहेका छन्।