ओलीका कारण गभर्नर नियुक्तिमा ढिलाइ भएको होइन : देउवा [भिडियो]

काठमाडौँ- नेपाली कांग्रेसका सभापति शेरबहादुर देउवाले राष्ट्र बैंकको गभर्नर नियुक्तिमा भइरहेको ढिलाई प्रधानमन्त्रीका कारण नभएको जिकिर गरेका छन्।

नेपाली कांग्रेस आर्थिक नीति तथा योजना विभागद्वारा मंगलबार सानेपामा आयोजित कार्यक्रममा देउवाले प्रधानमन्त्रीका कारण नभई राष्ट्र बैंकमा नै समस्या भएकाले गभर्नर नियुक्तिमा ढिलाई भएको बताएका हुन्।

प्रधानमन्त्री केपी ओलीले गभर्नर चयनको जिम्मा कांग्रेसलाई दिएको उनको भनाइ छ।

सभापति देउवाले अहिले सत्ता गठबन्धनमा कुनै समस्या नभएको समेत दाबी गरे।

अहिलेको प्रणालीमा एउटा पार्टीको मात्रै बहुमत आउने अवस्था नरहेकाले अन्य दलसंग गठबन्धन गर्नुपर्ने अवस्था रहेको उनको भनाइ छ।

सभापति देउवाले मुलुकको अर्थतन्त्रमा देखिएको शिथिलता क्रमश कम हुँदै गएको अवस्थामा कांग्रेस सम्मिलित गठबन्धन सरकारले आर्थिक विकासलाई गति दिनका लागि अझ मेहनत गर्नुपर्ने धारणा राखे।

आगामी बजेटमा धेरै योजना प्रस्ताव गर्ने तर पुरा नहुने स्थितिको अन्त्य गर्नुपर्नेमा उनले जोड दिए।

उनले सार्वजनिक सुरक्षाका कार्यक्रमलाई एकीकृत गर्नुपर्ने उल्लेख गरे।

सभापति देउवाले गिरिजाप्रसाद कोइरालाले सुरु गरेको उदारीकरणका कारण धेरै उद्योगधन्दाहरु खुलेको भन्दै गिरिजाप्रसादले सवै उद्योग बेचे भन्ने आरोप सत्य नभएको जिकिर गरे।

उद्योग गर्ने र व्यापार गर्ने काम सरकारको नभई उद्योगपति र व्यापारीहरुको भएको भन्दै उनले उद्योग र व्यापारको क्षेत्रमा सरकारले निजि क्षेत्रलाई सहजीकरण गर्ने विश्वास व्यक्त गरे।