गभर्नर नियुक्तिमा किन भइरहेको छ ढिलाइ?

काठमाडौँ- प्रधानमन्त्री केपी शर्मा ओलीले मन्त्रिपरिषद्को बैठक बोलाएका छन्। दिउँसो ५ बजे प्रधानमन्त्री निवास बालुवाटारमा ओलीले मन्त्रिपरिषद् बैठक बोलाएका हुन्।

बैठकमा गभर्नरको नियुक्ति प्रक्रिया, नीति तथा कार्यक्रममाथि संसदमा भएको बहस, सरकारका काम कारबाही र समसामयिक विषयमा छलफल गर्नका लागि बैठक बोलाइएको हो।

मन्त्रिपरिषदले पछिल्लो समय सर्वत्र चासोको विषय बनेको गभर्नर नियुक्तिको निर्णय गर्ने सम्भावना भने कम छ। उपप्रधानमन्त्री तथा अर्थमन्त्रीसमेत रहेका एमाले नेता विष्णु पौडेल नेतृत्वको गभर्नर सिफारिस समितिले सिफारिस नै नगरेका कारण मन्त्रिपरिषदले गभर्नर नियुक्त गर्ने सम्भवाना कम भएको हो।

सत्ताका ठूला दुई घटक नेपाली कांग्रेस र नेकपा एमालेका शीर्षतम नेतृत्व क्रमश शेरबहादुर देउवा र केपी शर्मा ओलीबीच कांग्रेसको भागमा गभर्नर दिने सहमति भएपनि सिफारिस समितिले काम गर्न सकेको छैन। गभर्नर सिफारिसमा आफ्नो मान्छे छिराउने वातावरण तयार गर्नका लागि ओलीसँगको समझदारीमा सिफारिस समितिका संयोजकसमेत रहेका अर्थमन्त्री पौडेलले गभर्नर सिफारिसका लागि समितिको बैठक राखेका छैनन्।

नेपाली कांग्रेसका सभापति देउवा राष्ट्र बैंकबाट राजीनामा दिएर बसेका डा गुणाकर भट्टलाई गभर्नर बनाउन चाहन्छन्। देउवाबाट गभर्नर बनाइने वचन पाएपछि भट्ट राजीनमा दिएर बसेका छन्। तर उनको राजीनामा कायममुकायम गभर्नरसमेत रहेकी डेपुटी गभर्नर निलम ढुंगानाले स्वीकृत गरिदिएकी छैनन्। प्रधानमन्त्री ओलीकै इशाारामा उनले भट्टको राजीनामा स्वीकृत नगरेर सरकारलाई अप्ठेरो बनाउन प्रयास गरेकी हुन्। उनी आफैँ पनि गभर्नरको दौडमा रहेकाले भट्टलाई गभर्नर बनाउने बाटो सजिलो बनाउने पक्षमा छैनन्।

उता ओली भने भट्टको राजीनामा स्वीकृत नहुँदै गभर्नर बनाइदिने र त्यसविरुद्ध मुद्दा पर्न सक्ने तथा भट्टको नियुक्तिलाई अदालतले खारेज गरिदिएर आफूले भनेको व्यक्तिलाई गभर्नर बनाउन सकिने रणनीतिमा छन्। यस्तो अवस्था आउन सक्ने आकलन देउवाले पनि गरेका छन्। त्यस्तो अवस्था आएमा अदालतले सिफारिसको दोस्रो नम्बरमा रहेको व्यक्तिलाई अदालतले गभर्नर बनाउन आदेश दिन सक्ने भएकाले सिफारिसको दोस्रो नम्बरमा पनि आफैँले भनेको व्यक्तिलाई राख्नपर्ने अडानमा छन्। देउवा र ओलीबीच यही विषयमा मतैक्यता नहुँदा पौडेल नेतृत्वको सिफारिस समितिले काम गर्न नसकेको हो। सिफारिस समितिले नै सिफारिस नगरेपछि पूरै प्रक्रिया अड्किएको छ।

भट्टको राजीनामा ढुंगानाले स्वीकृत नगर्नुलाई ओलीले राष्ट्र बैंकको आन्तरिक विषय भनेर देउवालाई ब्रिफिङ गरेका छन्। उक्त कुरा देउवाले सार्वजनिक मञ्चबाट भनिसकेका छन्। नेपाली कांग्रेस आर्थिक नीति तथा योजना विभागद्वारा मंगलबार सानेपामा आयोजित कार्यक्रममा देउवाले प्रधानमन्त्रीका कारण नभई राष्ट्र बैंकमा नै समस्या भएकाले गभर्नर नियुक्तिमा ढिलाई भएको बताएका थिए। प्रधानमन्त्री केपी ओलीले गभर्नर चयनको जिम्मा कांग्रेसलाई दिएको उनको भनाइ छ।