वीरगञ्जबाट ६१ हजार ८५९ गाडी भित्रिए, सरकारले असुल्यो १७ अर्ब २२ करोड कर

वीरगञ्ज- वीरगञ्ज नाका हुँदै चालु आर्थिक वर्षको ११ महिनामा १५ अर्ब ९२ करोडका इन्धनबाट चल्ने सानाठूला सवारीसाधन भित्रिएका छन्।

वीरगञ्ज भन्सार कार्यालयका प्रमुख भन्सार प्रशासक दीपक लामिछानेका अनुसार सो अवधिमा इन्धनबाट चल्ने अन एसेम्वल्ड मोटरसाइकलदेखि क्रेनलहरीसम्मका ५९ हजार ४७४ सवारीसाधन आयात भएका हुन्।

सो अवधिमा इन्धनबाट चल्ने सवारीसाधनबाट मात्र रु १५ अर्ब ३८ करोड राजस्व सङ्कलन भएको छ।

चालु आवको ११ महिनामा ५ अर्ब ७८ करोड मूल्यका ४४ हजार ४४० अनएसेम्वल्ड मोटरसाइकल आयातबाट रु ५ अर्ब ५१ करोड राजस्व सङ्कलन भएको छ। रु दुई अर्ब ६३ करोडका एक हजार ३०७ वटा अन्य बस तथा ट्रकका चेसिस आयात भएका छन्।

त्यस्तै सोही अवधिमा रु १ अर्ब ८० करोडका ८३९ वटा इन्धनबाट चल्ने जिप, कार र भ्यान आयात भएका छन्।

त्यसैगरी, चालु आवको ११ महिनामा रु १ अर्ब १६ करोड मूल्य पर्ने ५ हजार २२० ट्र्याक्टर तथा ट्रिलर आयात भएका छन्।

सोही अवधिमा रु एक अर्ब दुई करोड मूल्यका ३७४ वटा बस, रु ६७ करोड मूल्यका १३१ वटा क्रङ्क्रिट मिश्रण लहरी आयात भएका छन्। सोही अवधिमा रु ६६ करोड मूल्यका २७६ वटा ट्रक, मिनीट्रक आयात भएका छन्।

त्यस्तै, सोही अवधिमा रु ३९ करोड मूल्यका ४ हजार १६० वटा तयारी मोटरसाइकल आयात भएका छन्।

चालु आवको ११ महिनामा १ अर्ब ८४ करोड २३ लाखका सानाठूला २ हजार ३८५ वटा विद्युतीय सवारीसाधन आयात भएका छन्।

ती विद्युतीय सवारीसाधनको आयातबाट रु १ अर्ब ८४ करोड २७ लाख राजस्व सङ्कलन गरेको जनाएको छ।

समग्रमा चालु आवको ११ महिनामा सवारीसाधन आयातबाट १७ अर्ब २२ करोड र पार्टपुर्जासमेतको आयातबाट रु १७ अर्ब ७० करोड राजस्व सङ्कलन भएको छ।