प्रचण्डको आरोप : कांग्रेस-एमालेले संसदलाई ‘बिचौलियाको खेलमैदान’ बनाए

काठमाडौँ- नेकपा माओवादी केन्द्रका अध्यक्ष पुष्पकमल दाहाल प्रचण्डले दुई ठूला दलहरूको मिलोमतोले संसदलाई ‘बिचौलियाको खेलमैदान’ बनाएको आरोप लगाएका छन्।

सोमबार प्रतिनिधिसभा बैठकमा सम्बोधन गर्दै प्रचण्डले ठूला दुई दल मिलेर संख्याको बलमा संसदलाई ‘बिचौलियाको खेलमैदान’ बनाइएको आरोप लगाएका हुन्। यस्तो प्रवृत्ति देश र जनताका लागि लज्जास्पद र खेदजनक भएको उनले बताए। प्रचण्डले वर्तमान सरकार कामले कांग्रेस एमाले कै नेता कार्यकर्ता खुसी बन्न नसकेको भन्दै आलोचना समेत गरे।

अप्राकृतिक गठबन्धनको औचित्यमाथि प्रश्न उठाउँदै सरकारसँग जनताको भरोसा र नैतिक धरातल अझै बाँकी भए/नभएको विषयमा गम्भीर प्रश्न गरेका थिए। सरकारका गतिविधिबाट आम जनता मात्र होइन, सत्तारूढ दलकै कार्यकर्ता समेत असन्तुष्ट भएको उहाले बताए।

प्रचण्डले वर्तमान सरकार दलाल र बिचौलियाको स्वार्थमा चलेको उल्लेख गर्दै अप्राकृतिक गठबन्धनको चरित्र लोकले नै लाज मान्ने गरी उजागर भएको आरोप लगाए। ‘अर्बौंको चलखेल उल्ट्याउन र सेटिङ भत्काउन खोज्दा बनेको अप्राकृतिक गठबन्धन स्वयंले आफ्नो चरित्र प्रकट गरिसकेको छ,’ उनले भने।

सरुवा–नियुक्तिमा हुने लाखौंका डिलहरुजस्ता घटनाहरूको उदाहरण दिँदै उनले सरकार नियामक संस्थामाथि समेत बिचौलियाको इशारामा काम गरिरहेको गम्भीर आरोप लगाए।

त्यस्तै प्रचण्डले कांग्रेसले समेत जनताले दिएको मतलाई जनताको पक्षमा काम गर्ने गरी सदुपयोग गर्न नसकेको आलोचना गरे। उनले हालै देखिएका प्रतिगामी हर्कतहरू सरकारकै कमजोरी र असन्तुलनको परिणाम भएको उल्लेख गरे। प्रचण्डले गणतन्त्रमाथि कतैबाट खतरा छ भने राजवादी वा कसैबाट भन्दा पनि बढि सरकारबाटै खतरा रहेको टिप्पणी गरे।

अग्रगामी संविधान संशोधन गर्न दुईतिहाई बहुमत जुटाउनुपर्ने आवश्यकता औंल्याउँदै उनले सरकारसँग हिम्मत छ भने प्रमुख प्रतिपक्षका नाताले त्यो बहुमत जुटाउने जिम्मेवारी लिने स्पष्ट पारे।

संसद र संसदीय समितिमा भैरहेका भूमिकाप्रति समेत असन्तुष्टि जनाउँदै प्रचण्डले विधेयकहरू सर्वसम्मत पारित भए पनि प्रतिनिधिसभामा पुग्दा भएका चलखेल र हस्तक्षेपका कारण अगाडि बढ्न नसकेको भन्दै चर्को आलोचना गरे।