‘अझै बढ्न सक्छ सेयर बजार’

काठमाडौँ- पछिल्लो समय नेप्से बढ्दो क्रम (बुलिस ट्रेन्ड)मा छ। यही साउन १३ गते ३००२ बिन्दुमा पुगेको बजारमा त्यसपछि दुई दिन ‘करेक्सन’ भएर बिहीवार २९२२ अंकमा झरेको छ।

स्टक ब्रोकर एसोसिएसन नेपालका पूर्वअध्यक्ष प्रियराज रेग्मी सेयर बजारको ‘इनडेक्स’ अझै केही बढ्ने आधार बनेको बताउँछन्। नेपाल राष्ट्र बैंकमा नयाँ गभर्नर विश्वनाथ पौडेल नियुक्त हुनु र उनी सेयर बजारप्रति सकारात्मक देखिनु सेयर बजारका लागि शुभ मानिएको उनको भनाइ छ। पौडेल गर्भनर भएपछि सेयर कर्जाको रिक्स वेट १.२५ बाट घटाएर १ मा ल्याएका छन्। यसले पनि सेयर बजार बढाउन सहयोग गरेको उनको भनाइ छ।

व्यक्तिगत सेयर कर्जाको क्याप १५ करोड रुपैयाँमा सीमित थियो। त्यो अहिले बढाएर २५ करोड पुर्‍याइएको छ। बैंकदर घटेका कारण बैंक ब्याज पनि घट्दो छ। यसरी ब्याज घट्दा ऋणीको लागत कम पर्न जान्छ।

पछिल्लो समय देशको अर्थतन्त्र चलायमान बन्दै गएको छ। राजश्व संकलन विगत वर्षभन्दा बढ्दै गएको छ। ब्याज घटेकै कारण लागत घट्ने भएकाले सेयर बजार सुधारोन्मुख हुँदै गएको क्रिस्टल कञ्चनजंघा सेक्युरिटिजका सञ्चालकसमेत रहेका रेग्मीको बुझाइ छ।

‘सेयरबजार सकारात्मक छ। बजारमा देखिएका विभिन्न फ्याक्टरहरुले सेयर बजार बढ्ने संकेत गरेका छन्,’ रेग्मी बताउँछन्। सेयर बजारमा लगानीकर्ताको संख्या ६९ लाख पुगिसकेको छ। तीमध्ये करिब १५/१८ लाख त दोस्रो बजारमा पनि सक्रिय छन्।

हाइड्रोपावर, बैंक र बिमा कम्पनीहरूको कारोबार बढ्दो क्रममा छ। तुलनात्मक रूपमा सस्तो देखिएका यस्ता कम्पनीमा लगानीकर्ताको आकर्षण छ। बिजुली उत्पादनमा प्रयोग हुने कच्चा पदार्थ पानी निःशुल्क पाइन्छ। लगानी बैंकको ऋणबाट गरिएको हुन्छ। बैंकहरूले ब्याजदर घटाउँदा लागत पनि घट्ने र त्यसबाट नाफा बढ्ने भएकोले लागनीकर्ता हाइड्रोपावरतर्फ आकर्षित देखिएका छन्।

‘चार वर्षअघि ३१९८ बिन्दुमा पुगेर करेक्सन हुँदै झरेको सेयर बजारले विगतको रेकर्ड तोड्ने सम्भावना छ,’ स्टक ब्रोकर्स एसोसिएसनमा दुई पटक अध्यक्ष भइसकेका रेग्मीले भने।

अर्थमन्त्री विष्णुप्रसाद पौडेललाई पनि लगानीकर्ताहरूले सेयर बजारमैत्री मान्दै आएका छन्। पौडेल अर्थमन्त्री बनेपछि भएका सुधारका क्रियाकलापले नै सेयर बजारप्रति आकर्षण बढ्दै गएको र लगानीकर्ताको संख्या विस्तार भएर ६९ लाख पुगेको उनको छ। अहिले सेयर बजारमा ५० खर्बमाथि लगानी रहेको छ।

गभर्नर पौडेलले सेयर बजारमा आबद्ध लगानीकर्तालाई मुनाफा कमाउने कम्पनीहरूले बोनस सेयर दिनुको बदलामा नगद नै दिन सुझाव दिएका छन्। यसले बजारमा थप पैसा आउने र अर्थतन्त्र चलायमान बनाउन सहयोग हुने उनको तर्क छ। लगानीकर्तालाई बोनसका रूपमा सेयर दिनुभन्दा नगद रकम नै दिनु उपयुक्त हुने कुरामा रेग्मी पनि सहमत छन्।