आज राष्ट्रिय शोक, देशभरसहित विदेशी दूतावास र नियोगमा सार्वजनिक बिदा

काठमाडौँ: सरकारले गत भदौ २३ र २४ गते जेनजी युवाहरूको प्रदर्शनका क्रममा ज्यान गुमाएका शहीदहरूको सम्मानमा आज (असोज १ गते) राष्ट्रिय शोक बिदा दिएको छ। सामाजिक सञ्जालमा लगाइएको प्रतिबन्धपछि भ्रष्टाचारविरुद्ध भएको आन्दोलनका क्रममा कम्तिमा ७२ जना युवाको मृत्यु भएको थियो।

उक्त मृत्युपछि आन्दोलनका बलमा केपी शर्मा ओली नेतृत्वको नेकपा एमाले र नेपाली कांग्रेस गठबन्धनको सरकार ढाली आन्दोलनका बलमा पूर्व प्रधानन्यायाधीश सुशीला कार्कीको नेतृत्वमा भदौ २८ गते अन्तरिम सरकार गठन भएको थियो। भदौ ३० गते बसेको मन्त्रिपरिषद् बैठकले असोज १ गते राष्ट्रिय शोक मनाउन सार्वजनिक बिदा दिने निर्णय गरेको थियो।

उक्त निर्णयअनुसार आज नेपालभरका सरकारी कार्यालय, विदेशस्थित नेपाली दूतावास र नियोगहरूमा सार्वजनिक बिदा छ। राष्ट्रिय शोकमा यसदिन राष्ट्रिय झण्डा आधा झुकाइने छ।

आन्दोलनमा मृत्यु भएकाहरूलाई सरकारले शहीद घोषणा गरेको छ। उनीहरूको मंगलबार पशुपतिनाथमा शवयात्रासहित राष्ट्रिय सम्मानका साथ अन्त्येष्टि गरिएको छ भने कतिपय युवाको शव उनीहरूकै गृहजिल्लामा पुर्‍याइएको छ।