दुई महिनामा ३३ अर्ब विदेशी लगानी स्वीकृत, दर्ता हुने धेरै उद्योग आईटी क्षेत्रका

काठमाडौँ । चालु आर्थिक वर्ष २०८२/८३ को पहिलो दुई महिना (साउन–भदौ) मा ३३ अर्ब रुपैयाँभन्दा बढीको प्रत्यक्ष वैदेशिक लगानी (एफडीआई) स्वीकृत भएको छ।

उद्योग विभागको तथ्यांकअनुसार यस अवधिमा ३३ अर्ब ९ करोड २० लाख रुपैयाँ बराबरको एफडीआई स्वीकृति दिइएको हो। जसमध्ये १ अर्ब ३६ करोड रुपैयाँ अटोमेटिक रुटमार्फत र ३१ अर्ब ७२ करोड रुपैयाँ अप्रुभल रुटमार्फत स्वीकृत भएको छ।

साउनमा २४ अर्ब १० करोड विदेशी लगानी स्वीकृत भएकोमा भदौमा भने घटेको छ। भदौ महिनामा ९ अर्ब रुपैयाँ बराबरको विदेशी लगानी स्वीकृत भएको छ।

सबैभन्दा बढी चिनियाँ लगानीमा स्थापन हुने भैँसी मासु प्रशोधन उद्योगका लागि २० अर्ब रुपैयाँ लगानी स्वीकृत भएको छ। दुई महिनामा २ सय ३६ नयाँ उद्योग दर्ता भएका छन्। जसमध्ये ७ ठूला उद्योग, ४ मझौला उद्योग र २ सय २५ साना उद्योग रहेका छन्। भदौ महिनामै ५ ठूला र ४ मझौला उद्योग दर्ता भएका छन्।

उद्योग दर्ताका आधारमा सूचना प्रविधि (आईटी) क्षेत्रमा सबैभन्दा धेरै लगानी आकर्षित भएको देखिन्छ। दुई महिनामा दर्ता भएका कुल उद्योगमध्ये १ सय २० उद्योग आईटी क्षेत्रमा छन्, जसको हिस्सा ५१ प्रतिशत हुन्छ। त्यसपछि पर्यटन क्षेत्रमा ७९ उद्योग दर्ता भएका छन्, जुन ३४ प्रतिशत हो। बाँकीमा सेवा क्षेत्रमा १५, उत्पादनमा १२, कृषि क्षेत्रमा ९ र ऊर्जा क्षेत्रमा १ उद्योग दर्ता भएको छ।

क्षेत्रगत हिसाबले लगानी प्रतिबद्धता भने कृषिमा सबैभन्दा ठूलो देखिएको छ। दुई महिनामा कृषिमा २१ अर्ब ५९ करोड रुपैयाँ बराबरको लगानी प्रतिबद्धता आएको छ। दोस्रो स्थानमा पर्यटन क्षेत्र रहेको छ, जहाँ ६ अर्ब ६९ करोड रुपैयाँ बराबरको प्रतिबद्धता आएको छ।