काठमाडौँ: साताको दोस्रो कारोबार दिन शेयर बजार उच्च अंकले उकालो लागेको छ। अघिल्लो आइतबार सामान्य अंकले मात्र बढेको नेप्से यस मंगलबार भने उल्लेख्य वृद्धि गर्दै उच्च बिन्दुमा पुगेको छ।
नेपाल स्टक एक्सचेञ्ज (नेप्से) परिसूचक मंगलबार ६२.२९ अंकले उक्लिँदै २५७१.३४ विन्दुमा पुगेको छ। त्यस्तै, सेन्सेटिभ इन्डेक्स ११.९७ अंकले, फ्लोट इन्डेक्स ४.८६ अंकले र सेन्सेटिभ फ्लोट इन्डेक्स ४.३४ अंकले बढेका छन्।
१३ मध्ये १२ उपसमूह उकालो लागेका छन्। विकास बैंक उपसमूह सर्वाधिक ४.४७ प्रतिशतले बढेको छ। व्यापार समूह भने सामान्य घटेको छ।
यसदिन कारोबार रकम पनि बढेको छ। आइतबार २ अर्ब ६६ करोड रुपैयाँ बराबरको शेयर किनबेच भएको बजारमा मंगलबार ३१४ कम्पनीका ९२ लाख ४३ हजार कित्ता शेयर ४७ हजार ९४ पटकको कारोबारमार्फत ४ अर्ब ५७ करोड ३९ लाख रुपैयाँमा किनबेच भएको हो।
यस दिन तीन कम्पनीका शेयरमा सकारात्मक सर्किट लागेको छ। न्यादी हाइड्रोपावर, बुटवल पावर कम्पनी र एक्सेल डेभलपमेन्ट बैंकको शेयर मूल्य दिनभर सर्किट लेभलमा पुगेको हो। त्यस्तै, राधी विद्युत कम्पनी र लुम्बिनी विकास बैंकका शेयर क्रमशः करिब ९.५ र ९ प्रतिशतले उक्लिएका छन्। हिमालयन पावर पार्टनरको शेयरमूल्य भने सर्वाधिक ६.३६ प्रतिशतले घटेको छ।
