बीपी राजमार्ग पुनर्निर्माणका लागि जापानद्वारा २.६ अर्ब रुपैयाँ अनुदान सहायता

काठमाडौँ: नेपाल सरकार र जापान सरकारबीच बीपी राजमार्गको बाढी तथा पहिरो प्रभावित खण्डहरूको पुनर्निर्माण एवं मर्मतसम्भारका लागि अनुदान सहायता सम्झौता सम्पन्न भएको छ। जापान सरकारले यस कार्यका लागि २ अर्ब ८० करोड जापानी येन (करिब २ अर्ब ६० करोड नेपाली रुपैयाँ) बराबरको सहयोग प्रदान गर्नेछ।

बिहीबार अर्थ मन्त्रालयमा आयोजित एक विशेष समारोहमा यो सम्झौतामा हस्ताक्षर भएको हो। समारोहमा अर्थमन्त्री रामेश्वरप्रसाद खनाल र गृहमन्त्री ओम प्रकाश अर्यालको उपस्थिति रहेको थियो।

महोत्तरीको बर्दिबासदेखि काभ्रेपलाञ्चोकको धुलीखेलसम्म फैलिएको १५९ किलोमिटर लामो बीपी राजमार्ग जापानी अनुदान सहयोगमा नै निर्माण गरिएको थियो। गत वर्षको विनाशकारी बाढी र पहिरोका कारण यस राजमार्गका विभिन्न भागहरूमा ठूलो क्षति पुगेको थियो, विशेषगरी रोशी नदी आसपासका केही खण्डहरू पूर्ण रूपमा बगाएका थिए।

क्षतिग्रस्त खण्डहरूको पुनर्निर्माण र दिगो मर्मतसम्भारका लागि जापान सरकारले यो महत्वपूर्ण आर्थिक सहायता उपलब्ध गराएको हो।

अनुदान सहायतासम्बन्धी ‘एक्स्चेन्ज अफ नोट्स’ मा नेपाल सरकारका तर्फबाट अर्थ सचिव घनश्याम उपाध्याय र नेपालका लागि जापानी राजदूत महामहिम तोरु माएदाले हस्ताक्षर गरे। त्यसैगरी, अनुदान सम्झौतामा अर्थ मन्त्रालयको वैदेशिक सहायता समन्वय महाशाखाका सहसचिव धनीराम शर्मा र जापान अन्तर्राष्ट्रिय सहयोग एजेन्सी (जाइका) नेपालका प्रमुख प्रतिनिधि मित्सुजाकी मिजुकीले हस्ताक्षर गरे।

हस्ताक्षर समारोहपश्चात् अर्थमन्त्री खनाल, जापानी राजदूत तोरु माएदा र जाइका नेपालका प्रमुख प्रतिनिधि मात्सुजाकी मिजुकीले आफ्ना भनाइहरू राखेका थिए।

अर्थमन्त्री खनालले जापान नेपालको विकासका लागि एक भरपर्दो साझेदार रहेको बताउँदै नेपालको आर्थिक-सामाजिक विकास र पूर्वाधार निर्माणमा जापानले पुऱ्याउँदै आएको निरन्तर सहयोगप्रति कृतज्ञता व्यक्त गरे। उनले हालको अनुदान सहायता नेपाल र जापानबीचको मैत्री सम्बन्ध र सहकार्यको अर्को महत्वपूर्ण उदाहरण भएकोमा जोड दिए।

जापानी राजदूतले यो अनुदान सहयोगले बीपी राजमार्गका क्षतिग्रस्त भागहरूलाई पुनः सञ्चालनमा ल्याउन मद्दत पुग्ने विश्वास व्यक्त गर्दै नेपाल र जापानबीचको दशकौँ पुरानो मैत्रीपूर्ण सम्बन्धको स्मरण गरे।