‘आन्दोलनले सबैभन्दा क्षति निजी क्षेत्र व्यहोरेको छ, आगजनी र लुटपाट गर्नेमाथि कडा कारबाही होस्’

काठमाडौँ: नेपाल उद्योग वाणिज्य महासंघका अध्यक्ष चन्द्रप्रसाद ढकालले जेनजी आन्दोलनपछि खरानी भएको निजी क्षेत्र अहिले खरानी टक्टकाउँदै जुर्मुर्‍याउने प्रयत्नमा रहेको बताएका छन्। शनिबार नेपाल वाणिज्य तथा उद्योग महासंघले आयोजना गरेको राष्ट्रिय आर्थिक संवाद २.० कार्यक्रममा बोल्दै उनले विगतको तुलनामा जेनजी आन्दोलनले निजी क्षेत्रमा बढी नै क्षति पुगेको बताएका हुन्।

‘जेनजी आन्दोलनपछि खरानी भएको निजी क्षेत्र अहिले खरानी टक्टकाउँदै जुर्मुर्‍याउने प्रयत्न गरिरहेको छ। विगतको तुलनामा यस पटकको आन्दोलनले निजी क्षेत्रमा बढी नै क्षति पुगेको छ,’ उनले भने। उनले लगानीका लागि सापटी मागेर निजी क्षेत्रले जसोतसो भए पनि लगानी गरिरहेको भन्दै जेनजी आन्दोलनले आफैँले आफैँलाई फर्केर हेर्न बाध्य बनाएको बताए।

उनले निजी क्षेत्रमा पटकपटक प्रहार हुँदा पनि दरिलो र जिम्मेवार बनेको भन्दै निजी क्षेत्रले पनि आफ्नो समीक्षा गरिरहेको बताए।

‘निजी क्षेत्रको उदेश्य भनेको सेवा दिएर नाफा कमाउनु हो। तर यसको फरक बुझाइका कारण बारम्बार निजी क्षेत्रमा प्रहार हुने गरेको छ। तर पनि निजी क्षेत्र दरिलो र जिम्मेवार छ। हामी समीक्षा गर्दैछौँ कहाँ चुक्यौँ भनेर,’ उनले भने, ‘जेनजी आन्दोलनमा लुटपाट, आगजनी गर्नेलाई सरकारले कारबाही गरेर अगाडि बढ्न आवश्यक छ। निजी क्षेत्रको भावनालाई सरकारले बुझेको छ भन्ने आशा लिएका छौं।’