बेतन कर्णाली अर्धजलाशययुक्त आयोजना बनाउन ९३ अर्ब ४० करोड लगानी स्वीकृत

काठमाडौं। लगानी बोर्डले ४३९ मेगावाटको बेतन कर्णाली अर्धजलाशययुक्त जलविद्युत् परियोजनाको लगानी स्वीकृत गरेको छ। आयोजना बनाउन ९३ अर्ब ४० करोड ७६ लाख ३६ बराबरको लगानी स्वीकृत गरेको हो। बोर्डले लगानी स्वीकृत गरी परियोजना विकास सम्झौता (पीडीए)का लागि वार्ता समिति गठन गर्ने निर्णय गरेको छ।

प्रधानमन्त्री एवम् लगानी बोर्डका अध्यक्ष सुशीला कार्कीको अध्यक्षतामा बसेको ६७ औँ बैठकले अर्धजलाशययुक्त जलविद्युत् परियोजना अगाडि बढाउने निर्णय गरेको प्रधानमन्त्री तथा मन्त्रिपरिषद्को कार्यालयले जनाएको छ।

बैठकले गत आर्थिक वर्ष २०८१/०८२ को लगानी बोर्डको कार्यालयको प्रगति समीक्षा गर्दै चालु आर्थिक वर्ष २०८२०८३ को वार्षिक कार्ययोजना स्वीकृतसमेत गरेको छ। साथै, ६६९ मेगावाटको तल्लो अरुण जलविद्युत परियोजनाको उत्पादन अनुमतिपत्रको मस्यौदा स्वीकृतगरी अनुमतिपत्र जारी गर्न लगानी बोर्डको कार्यालयका प्रमुख कार्यकारी अधिकृत (सीईओ) लाई अख्तियारी प्रदान गरिएको छ।

बैठकले अरुण–३ जलविद्युत् परियोजनाको प्रत्यक्ष सम्झौता स्वीकृतिका लागि मन्त्रिपरिषद्मा प्रस्ताव पेश गर्ने निर्णय गरेको छ। पश्चिम सेती जलाशययुक्त जलविद्युत् परियोजना ८०० मेगावाटको सर्वेक्षण अनुमतिपत्रको म्याद थप गर्ने निर्णय गरेको प्रधानमन्त्रीको कार्यालयले जनाएको छ।