जलविद्युतमा लगानी बढाउँदै युनिभर्सल पावर कम्पनी, माथिल्लो इङखुखोला आयोजना बनाउने

काठमाडौं। नेपाल स्टक एक्सचेन्ज (नेप्से) मा सूचिकृत युनिभर्सल पावर कम्पनी लिमिटेडले नयाँ आयोजनामा लगानी गरेको छ। कम्पनीले २४.२२ मेगावाटको माथिल्लो इङखु खोला जलविद्युत आयोजना बनाउन लागेको हो।

नेपाल विद्युत प्राधिकरणसँग विद्युत खरिद सम्झौता (पीपीए) को प्रकृयामा रहेको छ। विद्युत विकास विभागसँग विद्युत उत्पादन अनुमतिपत्र (लाइसेन्स) को प्रकृयामा रहेको युनिभर्सलले जनाएको छ।

प्रस्तावित आयोजना सोलुखुम्बुको माप्य दुधकोसी गाउँपालिका वडा नम्बर ७ र सोताङ गाउँपालिका वडा नम्बर २ मा पर्छ। इङखु खोलामा २९ मिटर लामो पानी संकलन गर्ने संरचना निर्माण गरेर २९ सय ५० मिटर लामो सुरुङ हुँदै सोही खोलाको दाया किनारामा भूमिगत विद्युतगृह निर्माण गरी बिजुली उत्पादनको प्रस्ताव गरिएको छ।

युनिभर्सल पावरले लगानी गरेको राप्ती हाइड्रो एण्ड जनरल कन्सट्रक्सन लिमिटेडद्वारा प्रवद्र्धित पाँच मेगाावाटको रूकुमगाड जलविद्युत आयोजनाबाट विद्युतको व्यापारीक उत्पादन शुरू भईसकेको छ। राप्ती हाइड्रो नेप्सेमा सूचिकृत भइसकेको छ।

युनिभर्सलले दोलखामा ११ मेगावाटको खारेखोला जलविद्युत आयोजना सञ्चालन गरिरहेको छ।

युनिभर्सलले चालू आर्थिक वर्षको पहिलो त्रैमाशमा पाँच करोड ३६ लाख रुपैयाँ खुदनाफा गरेको छ। तीन महिनामा युनिभर्सलले बिजुली बेचेर युनिभर्सलले नौ करोड ५३ लाख रुपैयाँ आम्दानी गरेको छ।

गत साउन २३ मा अविरल वर्षापछि आएको बढीले आयोजनाको हेडवक्र्समा क्षति गराउँदा १२ दिन पूर्ण रुपमा बिजुली उत्पादन बन्द भएको युनिभर्सलले जनाएको छ। कम्पनीको चुक्ता पुँजी दुई अर्ब २८ करोड रुपैयाँ छ। जगेडा कोष तथा सञ्चित नाफा ३३ करोड ६६ लाख रुपैयाँ रहेको कम्पनीले जानाएको छ।

हाल युनिभर्सलको प्रतिसेयर आम्दानी ९.४० र प्रतिसेयर नेटवर्थ ११४.७६ रुपैयाँ रहेको छ।