गभर्नर पौडलले युवालाई भने-नयाँ प्रोडक्ट निकाल्नुहोस, विश्व बजारमा आँखा लगाउनुस, बैंकले साथ दिनेछ

काठमाडौँ: नेपाल राष्ट्र बैंकका गभर्नर विश्वनाथ पौडेलले पछिल्ला वर्षहरूमा नेपालको सूचना प्रविधि (आईटी) क्षेत्रले उल्लेखनीय प्रगति गरेको बताएका छन्। उनले सामाजिक सञ्जालमामार्फत सरकारी नीतिगत सुधार र केन्द्रीय बैंकका निर्णयले आईटी क्षेत्रलाई विश्व बजारतर्फ अघि बढ्न मार्गप्रशस्त गरेको दाबी गरेका हुन्।

उनले आफू राष्ट्र बैंकको गभर्नर बनेपछि पहिलाको सुधारभन्दा अघि बढेर नेपाली निर्यातकर्ता कम्पनीहरूलाई विदेशमा १० लाख डलरसम्म लगानी गर्न अनुमति दिएको बताएका छन्। हाल निर्यात नगरेका कम्पनीहरूलाई पनि २० हजार डलरसम्म लगानी गर्न दिइएको उनले  जानकारी गराएका छन्।

नतिजा हेरेर लगानी सीमामा संशोधन गर्दै जाने गभर्नर पौडेलले प्रतिबद्धता जनाएका छन्। वैदेशिक लगानीकर्ताहरूले कागजी काम (पेपरवर्क) धेरै भयो भनेर गुनासो गरेको सन्दर्भमा नाफा लग्न राष्ट्र बैंकको स्विकृती लिनुनपर्ने व्यवस्था रहेको उनले जानकारी गराएका छन्।

पछिल्ला केही वर्षयता नेपालको सूचना प्रविधि (आईटी) क्षेत्रले राम्रो मेहनत गरेको उनले बताएका छन्।

अर्थ मन्त्रालयले कम्पनी खोल्न सहज गर्ने, प्रत्यक्ष वैदेशिक लगानी (एफडीआई) सीमा संशोधन गर्ने, करको दर विश्वसनीय बनाउने जस्ता सुधारको आंशिक फलस्वरूप दुई वर्षअघि वैदेशिक लगानीमा करिब ४० वटा मात्रै आईटी कम्पनी खुलेको अवस्थामा एक वर्षअघि त्यो संख्या करिब ४०० पुगेको उनले बताए।

वि.स. २०२१ मा वैदेशिक लगानी गर्न प्रतिबन्ध लगाइएको हाम्रो देशमा भएका यी पहल दूरगामी असर पार्ने प्रकृतिको भएको बताउँदै गभर्नर पौडलेले भने ‘अब युवाहरूलाई अनुरोध छ, ढुक्क भएर नयाँ प्रोडक्ट निकाल्नुहोस, विश्व बजारमा आँखा लगाउनुहोस। पखेटा फैलाउनुहोस,मेहनत गर्नुहोस, नेपालबाटै जित्नलाई संसार हुनेछ। वैंकिङ क्षेत्रले तपाईंहरूको विस्तारमा सदैव साथ दिनेछ।’