अनलाइनबाटै कम्पनी दर्ता र खारेजी प्रक्रिया कार्यान्वयनमा लगिँदै

काठमाडौं– सरकारले अनलाइनबाटै कम्पनी दर्ता र खारेजी गर्ने बजेट घोषणाको कार्यान्वयन अघि बढाएको छ।

अर्थमन्त्री डा. प्रकाशशरण महतले आगामी आर्थिक वर्ष २०८०/८१ को बजेट घोषणामा गरिएको अनलाइनबाटै कम्पनी दर्ता र खारेजी सहजीकरणका लागि प्रक्रिया थालिएको कम्पनी रजिस्ट्रारको कार्यालयले जनाएको हो। बजेटको घोषणाअनुसार अनलाइनबाटै कम्पनी दर्ता र खारेजी कार्यान्वयनका लागि कम्पनीको विवरण अद्यावधिक गर्न सूचना जारी गरिएको रजिस्ट्रार महेश बरालले बताए।

शुक्रबारबाट विभागले दर्ता भइसकेका कम्पनीको विवरण अनलाइन प्रक्रियामार्फत अध्यावधिक गर्न निर्देशन दिइएको उनको भनाइ छ। कम्पनी सचिव, कम्पनीको ठेगाना, सेयर लागत, सेयर होल्डर सदस्य, उनीहरुको विवरण, कम्पनीको इमेल, सम्पर्क नम्बरलगायत विवरण पेस गर्न कम्पनी रजिस्ट्रारले सूचित गरेको छ।

‘सरकारले बजेटबाट गरेको घोषणा कार्यान्वयनका लागि प्रक्रिया सुरु गरेका छौं,’ उनले भने, ‘मागे जसरी कम्पनीले आफ्नो विवरण अध्यावधिक गरे हामीले कम्पनी दर्ता र खारेजी अनलाइनबाटै गर्ने कार्य थालनी गर्न सक्छौं।’

कम्पनीले आफ्नो विवरण पेस गरेपछि कम्पनी दर्ता, खारेजी, सेयर लागतलगायत कम्पनी विवरणसँग आवश्यक कागजपत्र हुलाक ठेगानामै पठाइनेछ। कम्पनी दर्ता तथा खारेजी प्रयोजनका लागि कार्यालयमा आइरहनुपर्ने बाध्यता हट्ने रजिस्ट्रार बरालले बताए।