पोखरा र समृद्धि फाइनान्सको स्वाप रेसियो तय, समान हैसियतमा मर्जमा जाने

काठमाडौं। पोखरा फाइनान्स लिमिटेड र समृद्धि फाइनान्स लिमिटेड समान हैसियतमा एकआपसमा विलय (मर्ज) हुने भएका छन्। दुबै फाइनान्सको सम्पत्ति तथा दायित्व मूल्यांकन (डीडीए) प्रतिवेदनले एक बराबर एक अनुपात निर्धारण गरेपछि पोखरा र समुद्धि मर्जमा जाने पक्का भएको हो। संयुक्त मर्जर समितिले सेयर अनुपात (स्पाप रेसियो) अनुमोदन गरेको छ।

गत भदौ ४ मा दुई फाइनान्सबीच मर्जमा जान एमओयू भएको थियो। गत असोज अन्तिम साता नेपाल राष्ट्र बैंकले मर्ज प्रक्रिया अघि बढाउन सर्तसहित आशयपत्र (एलओआई) दिएको थियो।

समृद्धि फाइनान्सको सञ्चालक समितिको आइतबार बसेको सञ्चालक समिति बैठकले डीडीएपछि आएको सेयर अनुपातलाई अनुमोदन गरी आउँदो माघ १४ गते साधारणसभा बोलाएको छ। सभाबाट पारित भएपछि मर्जको प्रक्रिया अघि बढ्ने छ।

समृद्धिको चुक्ता पुँजी ८१ करोड ८९ लाख रुपैयाँ छ। हाल पोखरा फाइनान्सको चुक्तापुँजी एक अर्ब आठ करोड २५ लाख रुपैयाँ छ। समृद्धिको ८१ करोड ८९ लाख रुपैयाँ छ।

राष्ट्र बैंकले दुबै फाइनान्सलाई तीन महिनाभित्र विशेष साधारणसभाबाट विशेष प्रस्ताव पारित गर्नुका साथै आवश्यक सबै प्रक्रिया पुरा गरी अन्तिम स्वीकृति दिने भनेको थियो।

पोखरा र समृद्धिलाई मर्जमा जान राष्ट्र बैंकले दियो आशयपत्र, तीन महिनाभित्र साधारणसभा गर्नुपर्ने

दुबै फाइनान्सको वित्तीय अवस्था नाजुक भएपछि विकल्पको रुपमा मर्जमा जान लागेका हुन्। मर्जमा गएपछि फाइनान्सको वित्तीय स्वास्थ्यमा सुधार आउने अपेक्षा गरिएको छ।

यसअघि गत साउनको पहिलो साता दुई संस्था मर्जमा जाने विषयमा प्रारम्भिक सम्झौता भएको थियो।

राष्ट्र बैंकले फाइनान्स कम्पनीको न्यूनतम चुक्ता पुँजी ८० करोड रुपैयाँ तोकेको छ।

गत आर्थिक वर्षको तेस्रो त्रैमासमा पोखरा फाइनान्सले सात करोड १९ लाख रुपैयाँ खुदनाफा गरेको छ। फोखरा फाइनान्सको सञ्चित कोष (रिजर्भ) आकार एक अर्ब आठ करोड रुपैयाँ छ भने उसको प्रतिसेयर आम्दानी ८.८७ रुपैयाँ ऋणात्मक छ। प्रतिसेयर नेटवर्थ ४८.७५ रुपैयाँ रहेको सार्वजनिक गरेको वित्तीय विवरणमा उल्लेख छ।

समृद्धि तीन करोड ५७ लाख रुपैयाँ नोक्सानमा छ। समृद्धिको रिजर्भ २५ करोड ५४ लाख रुपैयाँ रहेको कम्पनीले सार्वजनिक गरेको वित्तीय विवरणमा उल्लेख छ। पोखराको तुलनामा समृद्धिको वित्तीय अवस्था कमजोर देखिएको छ।

समृद्धिको प्रतिसेयर आम्दानी ४.३६ रुपैयाँ ऋणात्मक छ। उसको प्रतिसेयर नेटवर्थ ५३ रुपैयाँ रहेको कम्पनीले सार्वजनिक गरेको वित्तीय विवरणमा उल्लेख छ।