काठमाडौँ: नेपालका लागि जिली ‘ईएक्स फाइभ’को आधिकारिक आयातकर्ता तथा विक्रेता एलआरआर मोटर्सले २०२६ मोडलको जिली ‘ईएक्स फाइभ’ नेपाली बजारमा सार्वजनिक गरेको छ। वर्षको सुरुआतमै नयाँ मोडल सार्वजनिक हुनु नेपाली अटोमोबाइल बजारका लागि उल्लेखनीय भएको कम्पनीको भनाइ छ।
सामान्यतया अधिकांश आयातकर्ताहरूले नयाँ मोडल वर्षको मध्यतिर सार्वजनिक गर्ने प्रचलन रहँदै आएकोमा एलआरआर मोटर्सले २०२६ सालको पहिलो महिनामै २०२६ मोडल उपलब्ध गराएको हो। यसले नेपाली ग्राहकलाई नवीनतम प्रविधियुक्त सवारीसाधन छिटो उपलब्ध गराउने कम्पनीको प्रतिबद्धता देखाउने बताइएको छ।
२०२६ मोडलको जिली ‘ईएक्स फाइभ’मा इनबिल्ट एप्पल कारप्ले तथा एन्ड्रोइड अटो कनेक्टिभिटी समावेश गरिएको छ। यसमार्फत चालकहरूले नेभिगेसन, कल, सन्देश तथा मनोरञ्जन सुविधाहरू सहज रूपमा प्रयोग गर्न सक्नेछन्।
एलआरआर मोटर्सका बिक्री प्रमुख अधिर श्रेष्ठका अनुसार नयाँ मोडलले अद्यावधिक प्रविधि, सहज कनेक्टिभिटी र दीर्घकालीन मूल्य प्रदान गर्नेछ। प्रारम्भिक उपलब्धताले ग्राहकलाई पुरानो वा आउटगोइङ मोडल खरिद गर्नुपर्ने अवस्थाबाट जोगाउने कम्पनीको दाबी छ।
