सरकारले दियो ५३ अर्ब २९ करोड कर छुट, भन्सारको हिस्सा ठूलो

काठमाडौं। चालू आर्थिक वर्ष २०८२/०८३ को छ महिनामा सरकारले करदातालाई राजस्वमा ५३ अर्ब २९ करोड रुपैयाँ बराबरको कर छुट दिएको छ।

अर्थ मन्त्रालयले सार्वजनिक गरेको बजेटको अर्धवार्षिक मूल्यांकन प्रतिवेदनअनुसार उक्त छुटमध्ये सबैभन्दा ठूलो हिस्सा भन्सार प्रशासनमार्फत दिइएको हो।

प्रतिवेदनका अनुसार भन्सार प्रशासनबाट मात्रै ५२ अर्ब ८४ करोड ९६ लाख रुपैयाँ बराबरको कर छुट प्रदान गरिएको छ। यो छुट करिब चार खर्ब आठ अर्ब रुपैयाँ मूल्य बराबरका वस्तु आयात गर्दा दिइएको हो।

भन्सार प्रशासनअन्तर्गत आयातित वस्तुमा लाग्ने मूल्य अभिवृद्धि कर (भ्याट) मा मात्रै २९ अर्ब ७० करोड रुपैयाँ छुट दिइएको छ। यस क्रममा दुई खर्ब १६ अर्ब रुपैयाँ बराबरको वस्तु आयात भएको प्रतिवेदनमा उल्लेख छ।

त्यस्तै, कूटनीतिक सुविधाअन्तर्गत आयात गरिएका वस्तुमा ४८ करोड २९ लाख रुपैयाँ राजस्व छुट प्रदान गरिएको छ। यो सुविधाअन्तर्गत दुई अर्ब ५८ करोड ७५ लाख रुपैयाँ बराबरको वस्तु आयात भएको देखिन्छ।

सार्वजनिक, सामुदायिक तथा सरकारी निकायहरूले आयात गर्ने वस्तुमा पाउने छुटबापत ९५ करोड पाँच लाख रुपैयाँ राजस्व छुट दिइएको छ। यसअन्तर्गत तीन अर्ब ७५ करोड रुपैयाँ बराबरको वस्तु आयात भएको छ।

यसैगरी, विकास निर्माणसम्बन्धी परियोजनाहरूलाई एक अर्ब ४९ करोड ७८ लाख रुपैयाँ बराबरको कर छुट प्रदान गरिएको छ। ती परियोजनाहरूले चार अर्ब ९९ करोड रुपैयाँ बराबरको वस्तु आयात गरेका छन्।

साफ्टा सुविधाअन्तर्गत ४२ अर्ब ४० करोड रुपैयाँ बराबरको वस्तु आयात गर्दा दुई अर्ब ७६ करोड ९६ लाख रुपैयाँ राजस्व छुट दिइएको छ। साथै, विविध शीर्षकअन्तर्गत १७ अर्ब ४० करोड ३३ लाख रुपैयाँ बराबरको राजस्व छुट प्रदान गरिएको छ। जसमा एक खर्ब ४० अर्ब ७८ करोड रुपैयाँ बराबरको वस्तु आयात समावेश छ।

भन्सार बाहेक आन्तरिक राजस्वतर्फ पनि ५५ करोड ५७ लाख रुपैयाँ बराबरको कर छुट दिइएको छ। यसबाट तीन हजार ४७७ जना करदाता लाभान्वित भएको अर्थ मन्त्रालयले जनाएको छ।