भारतको भन्सार नीतिले केएल दुगडको तेल व्यापारमा चमक, साढे १४ अर्बको कारोबार

काठमाडौँ: व्यावसायिक घराना केएल दुगड ग्रुपले सञ्चालन गरिरहेको स्वास्तिक आयल इन्डष्ट्रिजको खाने तेल व्यापारमा चमक आएको छ। उद्योगको खाने तेल व्यापार १३० प्रतिशत बढेर १४ अर्ब ३६ करोड २० लाख रुपैयाँ पुगेको छ।

अघिल्लो वर्ष सन् २०२४ मा स्वास्तिक आयलले छ अर्ब २३ करोड ४० लाख रुपैयाँको तेल व्यापार गरेको थियो। अघिल्लो वर्षको तुलनामा गत वर्ष खाने तेल व्यापार आठ अर्ब १२ करोड २८ लाख रुपैयाँ बढेको सार्वजनिक गरिएको वित्तीय विवरणमा उल्लेख छ।

सन् २०२३ मा स्वास्तिक आयलले सात अर्ब र २०२२ मा १२ अर्ब ५१ करोड २० लाख रुपैयाँको खाने तेल व्यापार गरेको थियो। उद्योगले पाँच महिनामा छ अर्ब १५ करोड १० लाख रुपैयाँ कारोबार गरेको छ।

भारतले खाने तेलमा लिएको लचक नीतिले गर्दा नेपाली उद्योगहरूले प्रतिस्पर्धात्मक लाभ लिन पाएका छन्। भारतको भन्सार नीतिका कारण स्वास्तिक आयलको खाने तेल व्यापारमा चमक आएको हो।

भन्सार नीतिका कारण नेपालका सबै खाने तेल उद्योगले राम्रो व्यापार गरेका छन्। उद्योगले छ अर्ब ९२ करोड रुपैयाँबराबरको तेल भारतमा निर्यात गरेको छ। आर्थिक वर्ष २०२४ मा ३५ करोड, २०२३ मा ६२ करोड रुपैयाँबाट बढेर झण्डै सात अर्ब रुपैयाँ पुगेको छ।

उद्योगले मुख्यतया प्रशोधित सूर्यमुखी तेल, भटमासको तेल, तोरीको तेल, पामोलिन र वनस्पति घिउको बिक्रीबाट आम्दानी गरेको छ। उद्योगको क्षमता उपयोग आर्थिक वर्ष २०२४ मा १८ प्रतिशतबाट दोब्बर भई आर्थिक वर्ष २०२५ मा ३६ प्रतिशत पुगेको छ। जसले राम्रो सञ्चालन दक्षतालाई प्रतिबिम्बित गरेको छ।

स्वस्तिक आयल इन्डस्ट्रिज सन् १९८४ मा स्थापना भएको हो। उद्योगको प्लान्ट विराटनगरमा रहेको छ।

वनस्पति घिउसँगै प्रशोधित सोयाबिन, पामोलियन र सूर्यमुखीको प्रशोधन गर्दै आएको छ। उद्योगको कुल स्थापित क्षमता एक लाख ३५ हजार टन छ। यस्तै तोरीको तेल उत्पादन क्षमता वार्षिक १० हजार टन रहेको छ। उद्योगले खाने तेलको कच्चा वस्तु तोरी, सनफ्लावर र वनस्पति घिउ र पाम आयल विदेशबाट आयात गर्दै आएको छ।

केएल दुगड समूहले खाद्यान्न, प्याकेजिङ, जडीबुटी निकासी, जलविद्युत, सिमेन्ट, निर्माण र बैंकिङ तथा वित्तमा बलियो उपस्थिति राखेको छ। ग्रुपले युनाइटेड सिमेन्ट उद्योग सञ्चालन गरिरहेको छ।

स्वस्तिक आयलका अध्यक्ष विकास दुगड रहेका छन्। उनको व्यापार र उद्योगमा दुई दशकभन्दा बढीको अनुभव छ। उनी समूहमा संयुक्त प्रबन्ध निर्देशक पनि हुन।समूहले १८० भन्दा बढी उत्पादन आधारहरू आपूर्ति गर्दछ।

चामल, दाल, अन्न, शिशु खाना, मसला, चिया, पीठो, खाद्य तेल र अन्य खाद्यान्नहरू विभिन्न भौगोलिक क्षेत्रहरूमा अवस्थित आफ्नै बिक्री डिपोहरूबाट विभिन्न प्याकेजहरूमा समावेश छन्। उद्योगले घरेलु तथा अन्तर्राष्ट्रिय बजारमा स्वस्तिक, धारा, सनफ्लो, संगम र बिगुलका विभिन्न ब्रान्ड नामहरूमा बेच्दै आएको छ।

चालू आर्थिक वर्षको छ महिनामा नेपालबाट ६५ अर्ब ५६ करोड रुपैयाँ बराबरको खाद्य तेल निर्यात भएको छ। भन्सार विभागले सार्वजनिक गरेको छ महिनाको वैदेशिक व्यापार तथ्यांकअनुसार नेपालबाट सबैभन्दा बढी सोयाबिन आयल (भटमासको तेल) निर्यात भएको छ। यस अवधिमा मात्र ५६ अर्ब ८ करोड रुपैयाँ बराबरको सोयाबिन तेल निर्यात गरिएको छ।

त्यसैगरी, दोस्रो स्थानमा सनफ्लावर तेल रहेको छ। छ महिनामा चार अर्ब ७८ करोड रुपैयाँ बराबरको सनफ्लावर तेल निर्यात भएको भन्सार विभागले जनाएको छ।भन्सार विभागका अनुसार यी दुई प्रकारका तेलसँगै अन्य १२ प्रकारका तेलसमेत गरी नेपालबाट कुल ६५ अर्ब ५६ करोड रुपैयाँ बराबरको तेल निर्यात भएको छ।