नेपाली राष्ट्रिय टिमको एकैदिन तीन खेल हुँदै

काठमाडौं – नेपाली राष्ट्रिय क्रिकेट र फुटबल टिमको तीन खेल आजकै दिन जुधेका छन्। आज फरक फरक तीन देशमा नेपालको राष्ट्रिय महिला तथा पुरुष टिमले क्रिकेट खेल्नेछ भने नेपाली सिनियर पुरुष टिमले फुटबल खेल्ने छ।

हङकङमा रहेको महिला क्रिकेट टिमल आज भारत एको सामना गर्नेछ। एसीसी महिला टी-ट्वान्टी इमर्जिङ टिम्स एसिया कपमा नेपालले भारतको ए टिमविरुद्ध खेल्न लागेको हो।
नेपालले पहिलो खेलमा पाकिस्तानए सँग झिनो अन्तरको हार व्यहोरेको थियो । नेपालले पाकिस्तानलाई ८७ रनमा अलआउट गरेपनि ब्याटिङ नचल्दा २० ओभरमा मात्र ७८ रन बनाउन सकेको थियो।

तर आजको खेलमा नेपाल जितको लक्ष्यका साथ मैदानमा उत्रने छ।

यता, आजै नेपालले दोस्रो वार्मअप खेलमा ओमनको सामना गर्नेछ। जिम्मबावेमा हुन लागेको विश्वकपको ग्लोबल क्वालिफायर खेलमा नेपालले ओमनको सामना गर्न लागेको हो।

नेपाल र ओमानको खेल नेपाली समय अनुसार दिउँसो पौने १ मा जिम्बावेको हरारेमा सुरु हुनेछ।

यि दुवै टोली पहिलो वार्मअप खेलमा पराजित भएका थिए। त्यसैले आज जित निकाल्न दुवैलाई दबाब रहनेछ। पहिलो वार्मअप खेलमा नेपाल युएईसँग ३ विकेटले पराजित भएको थियो भने ओमान घरेलु टोलीसँग २८ रनले पराजित भएको थियो।

यता, आजै नेपाली पुरुष फुटबल टिमले फिलिपिन्ससँग खेल्ने तालिका रहेको छ। फिलिपिन्सको घरेलु मैदान रिजल मेमोरियल स्टेडियममा हुने खेल नेपाली समय अनुसार दिउँसो पौने ५ बजे बजे सुरु हुनेछ।

साफ च्याम्पियनसिपको तयारी गरिरहेको नेपाल बलियो प्रतिद्वन्दी फिलिपिन्सलाई हराउने योजनामा छ। तर, फिलिपिन्सविरुद्ध जित निकाल्न नेपाललाई सहज चाहिँ छैन।

नेपालले आज फिलिपिन्ससँग सातौं पटक खेल्न लागेको हो। यसअघि ६ भेटमा नेपालले एक जित र एक बराबरी खेल्दा चार हार व्यहोरेको छ।

भारतमा हुने १४ औं संस्करणको साफ च्याम्पियनसिपको तयारी अन्तर्गत नेपालले फिलिपिन्ससँग खेल्न लागेको हो।