डेपुटी गभर्नरविहीन भयो राष्ट्र बैंक, अब नयाँ नियुक्ति कहिले?

काठमाडौँ: नेपाल राष्ट्र बैंकका डेपुटी गभर्नरद्वय डा. निलम ढुंगाना तिम्सिना र बमबहादुर मिश्रको कार्यकाल सकिएको छ। तत्कालिन प्रधानमन्त्री केपी शर्मा ओलीको नेतृत्वको सरकारले गभर्नर महाप्रसाद अधिकारीको सिफारिसमा नियुक्त गरेका उनीहरूको कार्यकाल फागुन २५ देखि औपचारिक रूपमा सकिएसँगै राष्ट्र बैंक डेपुटी गभर्नरविहीन भएको छ।

प्रतिनिधिसभा निर्वाचन सकिएर मतपरिणाम आउने अन्तिम परिणाम आउने क्रममा छ। दलहरूबाट प्राप्त नामावली जाँचबुझ गरी आयोगले औपचारिक रूपमा विजयी घोषणा गर्न र प्रमाणपत्र दिन अझै केही समय लाग्ने भएकाले करिब दुई तिहाइनजिक पुग्ने निश्चित भएको राष्ट्रिय स्वतन्त्र पार्टी (रास्वपा) नेतृत्वको सरकार बन्न अझै दुई साता जति लाग्न सक्छ। आयोगले प्रत्यक्ष र समानुपातिकतर्फको समग्र प्रतिवेदन राष्ट्रपतिसमक्ष पेस गरेपछि मात्रै नयाँ सरकार नियुक्तिको प्रक्रिया सुरु हुनेछ।

निर्वाचन भैसकेको र नयाँ सरकार नबनिसकेको अवस्थामा दुई डेपुटी गभर्नरको पद रिक्त भएसँगै अब नयाँ नियुक्ति कहिले हुन्छ र को डेपुटी गभर्नर बन्छ भन्ने अन्योल भएको छ।

नेपाल राष्ट्र बैंक ऐनअनुसार डेपुटी गभर्नर विशिष्ट श्रेणीका कर्मचारी (कार्यकारी निर्देशकहरु) मध्येबाट नियुक्त गर्नुपर्ने व्यवस्था छ। हाल राष्ट्र बैंकमा १८ जना कार्यकारी निर्देशक छन्। प्रचलित व्यवस्थाअनुसार गभर्नरले तीमध्ये चार जनाको नाम मन्त्रिपरिषदमा सिफारिस गर्नेछन्। सरकारले ती चारमध्येबाट दुई जनालाई डेपुटी गभर्नरमा नियुक्त गर्नेछ।

राष्ट्र बैंकमा हाल नरेश शाक्य, रेवतीप्रसाद नेपाल, रामु पौडेल, विश्रुत थापा, दयाराम शर्मा, गुरुप्रसाद पौडेल, डा. सत्येन्द्र तिमिल्सिना, किरण पण्डित, चेतप्रसाद उप्रेती, रोशनकुमार सिग्देल, डा. रामशरण खरेल, डा. डिल्लीराम पोख्रेल, दीर्घबहादुर रावल, निश्चल अधिकारी, अनुज दाहाल, दीपकराज लामिछाने र राजन विक्रम थापा कार्यकारी निर्देशक पदमा कार्यरत छन्। कानुनी रूपमा हेर्दा गभर्नरले यीमध्ये जुनसुकै कार्यकारी निर्देशकलाई पनि सिफारिस गर्न सक्ने अधिकार राख्छन्।