एक अर्ब लगानी थपेर क्षमता बढाउँदै ओम हस्पिटल, २०० बेडको ‘मल्टिस्पेसियालिटी’ बनाउने

काठमाडौं। पछिल्लो समय हस्पिटलमा लगानी बढ्दै गएको छ। राजधानीलगायत प्रमुख सहरहरुमा अर्बौं रुपैयाँ निजी लगानीमा ‘मल्टिस्पेसियालिटी’ हस्पिटल निर्माण भइरहेका छन्।

राम्रो प्रतिफल देखिएपछि निजी क्षेत्रका साथै बैंक तथा वित्तीय संस्थाहरुले यस क्षेत्रमा लगानी बढाइरहेका छन्। उपचार गर्न आउने विरामीहरुले पनि राम्रो सेवा पाइरहेका छन्।

यस्तै सञ्चालनमा रहेको ओम हस्पिटल एन्ड रिसर्च सेन्टर प्रालिले क्षमता विस्तार गर्न लागेको छ। हस्पिटलले झण्डै एक अर्ब रुपैयाँ लगानी गरेर क्षमता दूई सय श्यैया बनाउन लागेको हो। अस्पतालको क्षमता बढाएर ‘मल्टिस्पेसियालिटी’ स्तरको बन्ने भएको छ।

अस्पतालको बेड क्षमता बढाएर अन्य अत्याधुनिक सुविधा थप गर्ने योजना रहेको हस्पिटलले जनाएको छ। अस्पताल हाताभित्र १० हजार ४२३ वर्गमिटरमा नयाँ भवन निर्माण हुने भएको छ। नयाँ भवन निर्माणपछि अस्पताल १५ रोपनी क्षेत्रफलमा फैलने बताइएको छ।

क्षमता बढाउन ओम हस्पिटलले हाल वातावरणीय प्रभाव मूल्यांकन (ईआईए) सुरु गरेको छ। ईआईएका निम्ति क्षेत्र निर्धारणको काम थालिएको अस्पतालले जनाएको छ। ईआईए प्रतिवेदनको तयारीका लागि ग्रीन ग्लोब इन्टरनेसनले परामर्शको काम गरिरहेको छ।

२०४६ सालमा ओम नर्सिङ होमका नामले काठमाडौंको कमलपोखरीबाट स्वास्थ्य सेवा सुरु गरिएको ओमले अहिले राजधानीको चाबहिलमा साम्राज्य स्थापना गरेको छ।

सुरुमा ओम नर्सिङहोम आठ शैय्या र तीन चिकित्सकबाट सञ्चालित थियो। २०५२ मा नर्सिङहोम ओम हस्पिटल एन्ड रिसर्च सेन्टरमा परिणत भएपछि सेवा र क्षमता दुवै विस्तार गरिएको थियो।

यो अस्पताल काठमाडौं महानगरपालिका–७, चाबहिलमा छ। हस्पिटलमा १०० परामर्शदाता चिकित्सक र ५०० भन्दा बढी कर्मचारी कार्यरत छन्।