‘सस्तो ब्याजदर भएर मात्र हुँदैन, उद्योग चल्न बजार चाहिन्छ’

उद्योग व्यवसाय केवल सस्तो ब्याजदरका आधारमा मात्र  चल्दैनन्। उद्योगमा लगानी हुनका लागि सबैभन्दा पहिले बजार चाहिन्छ। उत्पादनको माग चाहिन्छ र व्यवसाय गर्ने अनुकूल वातावरण चाहिन्छ।

जब कुनै उद्यमीले मैले उत्पादन गरेको वस्तु बिक्री हुन्छ, उचित नाफा कमाउन सक्छु, बैंकबाट लिएको ऋण समयमै तिर्न सक्छु र ब्याज पनि सहज रूपमा भुक्तानी गर्न सक्छु भन्ने विश्वास गर्छ। तब मात्र उसले नयाँ लगानी गर्ने निर्णय लिन्छ।

तर, यदि बजार नै छैन, माग कमजोर छ र व्यवसायको भविष्य अनिश्चित छ भने बैंकको ब्याजदर तीन प्रतिशत भए पनि उद्यमी व्यवसायीले ऋण लिन हिचकिचाउँछ। किनभने उद्यमीको मुख्य चिन्ता ब्याजदर मात्र होइन, व्यवसाय टिक्ने र सफल हुने विश्वास हो।

त्यसैले आर्थिक गतिविधि बढाउन ब्याजदर घटाउनु मात्र पर्याप्त हुँदैन। सरकार र सम्बन्धित निकायले बजार विस्तार, उत्पादनको माग वृद्धि, नीतिगत स्थिरता, पूर्वाधार विकास र व्यवसायमैत्री वातावरण निर्माणमा समान रूपमा ध्यान दिनुपर्छ। यिनै आधारहरू बलियो भए मात्र लगानी बढ्छ, उद्योग फस्टाउँछन्, रोजगारी सिर्जना हुन्छ। देशको अर्थतन्त्र दिगो रूपमा अघि बढ्छ।