अर्थमन्त्री वाग्लेले सुरु गरे बजेट कार्यान्वयनबारे छलफल

काठमाडौँः अर्थमन्त्री डा. स्वर्णिम वाग्लेले आर्थिक वर्ष २०८३/८४ को बजेट कार्यान्वयनका विषयमा छलफल सुरु गरेका छन्।

सोमबार मध्याह्नदेखि अर्थ मन्त्रालयको सुवर्ण हलमा बजेट कार्यान्वयनसँग सम्बन्धित प्रमुख मन्त्रालयका सचिवहरूको सहभागितामा छलफल सुरु भएको अर्थमन्त्रीको सचिवालयले जनाएको छ।

अर्थमन्त्री डा. वाग्लेको अध्यक्षतामा जारी बैठकमा राष्ट्रिय योजना आयोगका उपाध्यक्ष डा। गुणाकर भट्ट र अर्थ सचिव डा. घनश्याम उपाध्यायसहित विभिन्न मन्त्रालयका सचिव तथा प्रतिनिधिहरू सहभागी छन्।

बैठकमा भौतिक पूर्वाधार तथा यातायात, उद्योग, वाणिज्य, कृषि, स्वास्थ्य, शिक्षा, परराष्ट्र, संस्कृति, पर्यटन तथा नागरिक उड्डयन, श्रम, महिला, बालबालिका तथा ज्येष्ठ नागरिक, गृह र रक्षा मन्त्रालयका सचिव तथा प्रतिनिधिहरूको सहभागिता रहेको छ।

छलफलमा आगामी आर्थिक वर्षको बजेटलाई प्रभावकारी रूपमा कार्यान्वयन गर्ने उपाय, मन्त्रालयगत प्राथमिकता तथा बजेट कार्यान्वयनका क्रममा देखिन सक्ने चुनौतीका विषयमा छलफल हुने बताइएको छ।