महिला नेतृत्व शिखर सम्मेलनको तयारी पूरा

काठमाडौँ- नेपाल उद्योग परिसंघले चैत्र ११ र १२ गते आयोजना गर्न लागेको महिला नेतृत्व शिखर सम्मेलनको तयारी पूरा भएको जानकारी दिएको छ। परिसंघ महिला नेतृत्व मञ्चको संयोजनमा काठमाडौँमा हुने दुईदिने अन्तर्राष्ट्रिय सम्मेलन हुन लागेको हो।

कोभिड महामारीपछि महिला नेतृत्वका तीनवटा प्रमुख क्षेत्रमा केन्द्रित रहेर सम्मेलन आयोजना गर्न लागिएको हो। कोभिडका कारण महिलामा परेको असर, त्यसका विषयमा छलफल र समाधान खोज्ने उद्देश्य सम्मेलनको रहेको परिसंघका उपाध्यक्ष निर्वाण चौधरीले बताए।

सम्मेलनमा लैङ्गिक समानताका विषयसहित महिला नेतृत्वहरुबीच विचार आदानप्रदान गर्ने, साझा रणनीति बनाउने, महिलाहरुका सफलता सुनाउने, महिलालाई प्रोत्साहित गर्ने र एकअर्काबाट सिक्ने अवसर प्राप्त हुने उनले बताए।

नेतृत्वमा महिला, अर्थतन्त्रमा महिलाको योगदान, र परिवर्तनका संवाहक महिला विषयमा छुट्टा छुट्टै सत्रमा छलफल हुने परिसंघ महिला उद्यमी मञ्च सभापति छाया शर्माको भनाइ छ। उनले विभिन्न सत्रमा नेपालसहित भारत, पाकिस्तान, श्रीलंका, बंगलादेश, भुटान, माल्दिस, जर्मनीलगायत मुलुकका राजनीति, आर्थिक, सामाजिक, वातावरणलगायतका क्षेत्रमा स्थापित, रुपान्तरणकारी एवं प्रभावशाली व्यक्तित्वको सहभागिता सुनिश्चित भइसकेको जानकारी दिइन्।

सम्मेलनमा सामाजिक र सूचना प्रविधि क्षेत्रमा उच्च योगदान पुर्‍याएका दुई महिलालाई सम्मान गरिनेछ। उद्यमशीलता प्रवर्द्धनका लागि महिला उद्यमीबाट उत्पादित स्वदेशी वस्तुहरुको प्रदर्शनीसमेत गरिने परिसंघले जनाएको छ।

दुईदिने सम्मेलनको निष्कर्ष नेपाल सरकारलाई हस्तान्तरण गरिनेछ।