यामाहा एक्सएसआर १५५ को बुकिङ खुला, मूल्य कति पर्ला?

काठमाडौं : रेट्रो डिजाइन र आधुनिक प्रविधिको संयोजनमा तयार गरिएको यामाहाको नयाँ एक्सएसआर १५५ मोटरसाइकल नेपाल भित्रिने भएको छ। यसको अग्रिम बुकिङ खुला गरिएको छ।

नेपालका लागि यामाहाको आधिकारिक वितरक एमएडब्लू राइड्सका अनुसार ग्राहकले ५ हजार रुपैयाँ अग्रिम रकम बुझाएर अनलाइन वा कम्पनीका शोरुममार्फत बुकिङ गर्न सक्नेछन्।

यो मोडल बीएमसी, भीआरसी–१, डब्लूएमसी र एसएमएक्स गरी चार संस्करणमा उपलब्ध हुनेछ। प्रत्येक संस्करणको मूल्य फरक–फरक निर्धारण गरिएको छ। बीएमसीको मूल्य रु. ५ लाख २९ हजार ९००, भीआरसी–१ को रु. ५ लाख ३९ हजार ९००, डब्लूएमसीको रु. ५ लाख ४९ हजार ९०० र एसएमएक्सको रु. ५ लाख ५९ हजार ९०० तोकिएको छ।

कम्पनीले सार्वजनिक बिक्री सुरु हुने मिति भने औपचारिक रूपमा घोषणा गरेको छैन। यद्यपि, आगामी भदौमा आयोजना हुने नाडा अटो शोमा यो मोटरसाइकल सार्वजनिक गर्ने तयारी कम्पनीको छ।

एक्सएसआर १५५ यामाहाको आर–१५ र एमटी–१५ मा प्रयोग भएको १५५ सीसी क्षमताको इन्जिन प्लेटफर्ममै आधारित मोडल हो। यसमा सिंगल सिलिन्डर, फोर–स्ट्रोक, फ्युल इन्जेक्सन र भेरिएबल भल्भ एक्टुएसन (भीभीए) प्रविधियुक्त इन्जिन जडान गरिएको छ, जसले १८.४ पीएस शक्ति र १४.२ एनएम टर्क उत्पादन गर्छ। मोटरसाइकलमा ६–स्पिड गियरबक्ससँगै असिस्ट तथा स्लिपर क्लचको सुविधा पनि दिइएको छ।