निजी क्षेत्रलाई अर्थमन्त्री वाग्लेको आग्रहः ‘नेपालमा अझ ठूलो लगानी गर्नुहोस्’

काठमाडौँः अर्थमन्त्री डा. स्वर्णिम वाग्लेले नेपालमा लगानी गरिरहेका बहुराष्ट्रिय कम्पनीलाई थप लगानी गर्न र भएका उद्योग विस्तार गर्न आग्रह गरेका छन्।

नेपालमा लगानी गरेका बहुराष्ट्रिय कम्पनीहरूसँगको छलफलमा अर्थमन्त्री वाग्लेले निजी क्षेत्रको सफलता नै नेपालको आर्थिक सफलताको आधार भएको बताएका हुन्।

उनले सरकार निजी क्षेत्रलाई शङ्काको दृष्टिले नभई साझेदारका रूपमा हेर्ने स्पष्ट पार्दै लगानी, उत्पादन, नाफा र पुनःलगानीको चक्रलाई तीव्र बनाउने सरकारको प्राथमिकता रहेको बताए।

‘नेपालमा अझ ठूलो लगानी गर्नुहोस्, भएका उद्योग विस्तार गर्नुहोस्, नयाँ उत्पादनमा प्रवेश गर्नुहोस्, नयाँ प्रविधि भित्र्याउनुहोस् र नयाँ रोजगारी सिर्जना गर्नुहोस्,’ अर्थमन्त्री वाग्लेले भने।

उनका अनुसार उद्योगले कमाएको नाफा पुनःलगानी हुँदा उत्पादन बढ्ने, उत्पादन बढेपछि रोजगारी सिर्जना हुने, रोजगारीबाट आम्दानी र बजार विस्तार हुने तथा अन्ततः त्यसबाट राज्यको राजस्वसमेत बढ्नेछ।

लगानीको सुरक्षा सरकारको दायित्व

अर्थमन्त्री वाग्लेले नेपालमा वैध रूपमा गरिएको लगानी, सिर्जना गरिएको सम्पत्ति र आर्जन गरिएको नाफाको सुरक्षा गर्नु सरकारको प्रमुख दायित्व भएको बताए।

लगानीकर्ताले आफ्नो सम्पत्ति सुरक्षित रहेको, नियम स्थिर रहेको, कर प्रणाली पूर्वानुमेय रहेको र राज्य निजी क्षेत्रको साझेदारका रूपमा उभिएको विश्वास गर्नुपर्ने उनको भनाइ छ।

‘विश्वास निर्माण नगरी ठूलो लगानी आउँदैन। विश्वास निर्माण नगरी उद्योग विस्तार हुँदैन। विश्वास निर्माण नगरी आर्थिक रूपान्तरण सम्भव हुँदैन,’ उनले भने।

निजी क्षेत्रसँग समस्या र समाधानबारे सुझाव माग

अर्थमन्त्री वाग्लेले व्यवसाय विस्तारमा देखिएका मुख्य अवरोधबारे बहुराष्ट्रिय कम्पनीबाट स्पष्ट सुझावसमेत मागेका छन्।

उनले कर प्रशासन, नियमन, जग्गा, ऊर्जा, श्रम, पूर्वाधार, वित्त, निर्यात, कानुनी व्यवस्था तथा सरकारी प्रक्रियामध्ये तत्काल सुधार गर्नुपर्ने क्षेत्र पहिचान गर्न आग्रह गरे।

त्यस्तै, सरकारले आगामी छ महिनाभित्र गर्नुपर्ने सबैभन्दा महत्त्वपूर्ण पाँच निर्णयबारे समेत निजी क्षेत्रसँग सुझाव मागिएको छ।

वाग्लेले बैठकमा सुझाव संकलन गरेर मात्र नरोकिने भन्दै समाधानको कार्यसूची बनाएर कार्यान्वयनमा लैजाने प्रतिबद्धता जनाए।

समस्या समाधान नभएसम्म संवाद जारी रहने

छलफलमा उठेका विषयको कार्यान्वयनका लागि सम्बन्धित मन्त्रालयसँग समयबद्ध समन्वय गरिने अर्थमन्त्रीले बताए। अर्थ मन्त्रालयले प्रतिक्रिया कक्षमार्फत विषयहरूको निरन्तर अनुगमन गर्ने र समस्या समाधान नभएसम्म निजी क्षेत्रसँगको संवादलाई निरन्तरता दिने उनको भनाइ छ।

यसअघि अर्थमन्त्री वाग्लेले उद्योगी–व्यवसायी तथा बैंकिङ क्षेत्रका प्रतिनिधिसँग बजेट कार्यान्वयन, लगानी विस्तार र आर्थिक गतिविधि बढाउने विषयमा छलफल गर्दै आएका छन्।

अर्थमन्त्रीले करदातालाई केवल राजस्वको स्रोतका रूपमा नभई राष्ट्र निर्माणको साझेदारका रूपमा सम्मान गर्ने सरकारको नीति रहेको समेत बताए।

उनले नेपाललाई लगानीमैत्री, व्यवसायमैत्री र उत्पादनमुखी अर्थतन्त्र बनाउने अभियानमा सरकार र निजी क्षेत्रबीचको सहकार्य आवश्यक रहेको उल्लेख गर्दै आगामी दशकलाई ठूलो लगानी, उत्पादन र रोजगारीको दशक बनाउनुपर्नेमा जोड दिए।