‘चेरी क्यू’ ईभी सार्वजनिक, ३१ लाखमै किन्न पाइने, एकपटकको चार्जमा कति गुड्छ?

काठमाडौँ: नेपालका लागि चेरीको आधिकारिक विक्रेता पायोनियर मोटो कर्पले आफ्नो नयाँ विद्युतीय सवारी चेरी क्यू सार्वजनिक गरेको छ। मंगलबारदेखि भृकुटीमण्डपमा सुरु भएको ‘नाइमा नेपाल मोविलिटी एक्स्पो’ को अवसर पारेर कम्पनीले यो प्रिमियम ह्याचब्याक सार्वजनिक गरेको हो।

नयाँ प्रविधिको प्रयोग र आधुनिक स्वरूपमा तयार पारिएको यस कारको मूल्यमा कम्पनीले विशेष सहुलियतको समेत घोषणा गरेको छ।

कम्फर्ट र प्रिमियम गरी दुई भेरियन्टमा उपलब्ध यो गाडीको बजार मूल्य क्रमशः ३४ लाख ४९ हजार र ३५ लाख ९९ हजार रुपैयाँ तोकिएको छ। यद्यपि, एक्स्पो अवधिका लागि विशेष योजना अन्तर्गत ग्राहकले यी गाडीहरू क्रमशः ३० लाख ९९ हजार र ३२ लाख ९९ हजार रुपैयाँमै खरिद गर्न सक्नेछन्।

चेरी क्यूमा ४१.२ किलोवाट आवरको उच्च क्षमताको ब्याट्री प्याक जडान गरिएको छ। कम्पनीका अनुसार यो गाडीले एकपटकको पूर्ण चार्जमा ४०० किलोमिटरसम्मको माइलेज (रेन्ज) प्रदान गर्दछ। यसमा ८५ किलोवाटसम्मको डिसी फास्ट चार्जिङ सपोर्ट हुन्छ, जसको मद्दतले मात्र १६ मिनेटमा ब्याट्रीलाई ३० प्रतिशतबाट ८० प्रतिशतसम्म पुर्‍याउन सकिन्छ। साथै, यसमा रहेको भी टु एल प्रविधिबाट बाह्य विद्युतीय उपकरणहरू समेत चलाउन मिल्छ।

नेपाली सडक सुहाउँदो १७५ एमएमको ग्राउण्ड क्लियरेन्स भएको यो एसयूभी मोडलमा १५.६ इन्चको विशाल इन्फोटेन्मेन्ट स्क्रिन र ५४० डिग्रीको सराउण्ड क्यामेरा राखिएको छ। सुरक्षालाई प्राथमिकता दिँदै यसमा २० भन्दा बढी सुविधाहरू भएको एडास प्रविधि समावेश गरिएको छ।