सिटिजन्स बैंकको नाफामा ६३ प्रतिशत उछाल आउँदा पुग्यो २ अर्ब १० करोड, ईपीएस ५६ प्रतिशत बढ्यो

काठमाडौं। सिटिजन्स बैंकको नाफामा उछाल आएको छ। गत आर्थिक वर्षमा बैंकको खुदनाफा ६३ प्रतिशत बढेर २ अर्ब ९ करोड ८६ लाख रुपैयाँ पुगेको छ। अघिल्लो आर्थिक वर्षमा बैंकको खुदनाफा १ अर्ब २८ करोड ७० लाख रुपैयाँ मात्र थियो।

अघिल्लो वर्षको तुलतामा गत आर्थिक वर्ष सिटिजन्स बैंकको खुदनाफा ८१ करोड १५ लाख रुपैयाँ बढेको सार्वजनिक गरेको वित्तीय विवरणमा उल्लेख छ।

इम्पेयरमेन्ट र निक्षेप लागत घट्दा बैंकको नाफामामा सुधार देखिएको हो। यससँगै बैंकको नाफामा मात्रै नभई प्रति सेयर आम्दानी (ईपीएस) क्षमतामासमेत उल्लेख्य सुधार देखिएको छ।

बैंकको वित्तीय प्रदर्शनमा बलियो सुधार हुनुका ईपीएसमा पनि सुधार देखिएको छ। बैंकको ईपीएस ५६ प्रतिशत बढेर १३.५३ रुपैयाँ पुगेको छ। अघिल्लो वर्ष ईपीएस ८.६८ रुपैयाँ थियो। यस्तै प्रतिसेयर नेटवर्थ १६०.५१ रुपैयाँ छ।

खुद नाफा र ईपीएस दुवैमा आएको सुधारले बैंकको आम्दानी क्षमता मजबुत हुँदै गएको देखिएको छ।

इम्पेयरमेन्ट चार्जमा आएको ६९.०५ प्रतिशत कमीले नाफा बढाउन महत्वपूर्ण योगदान देखिएको छ। अघिल्लो वर्ष २ अर्ब ६८ करोड रुपैयाँ रहेको इम्पेयरमेन्ट चार्ज यस वर्ष घटेर ८२ करोड ९४ लाख रुपैयाँमा सीमित भएको बैंकले जानकारी दिएको छ। यसले बैंकको नाफामा सकारात्मक प्रभाव पारेको छ।

त्यसैगरी, बैंकको निक्षेप लागत ४.४९ प्रतिशतबाट घटेर ३.३६ प्रतिशतमा सीमित भएको छ। घट्दो ब्याजदर वातावरणमा बैंकले आफ्नो स्रोत लागत व्यवस्थापनमा सुधार गरेको देखिन्छ।

बैंकको खुद शुल्क तथा कमिसन आम्दानी ६.३३ प्रतिशत बढेको छ भने नेट ट्रेडिङ तथा अन्य सञ्चालन आम्दानीमा ५१.१२ प्रतिशतको वृद्धि भएको छ।
वितरणयोग्य नाफा कम देखिनुको कारण नियामकीय समायोजन रहेको छ।

बैंकको खुद नाफा २ अर्ब १० करोड रुपैयाँ पुगे पनि वितरणयोग्य नाफा ५२ करोड ३१ लाख रुपैयाँ छ। बैंकको लाभांश क्षमता ३.३७ प्रतिशत कायम छ।

यो अन्तरलाई सञ्चालन नाफा कमजोर भएको अर्थमा लिनुपर्ने अवस्था नभएको बैंकले जनाएको छ। वितरणयोग्य नाफा निर्धारण गर्दा नेपाल राष्ट्र बैंकका नियामकीय व्यवस्था, वैधानिक विनियोजन तथा विभिन्न समायोजनहरू लागू हुने भएकाले खुद नाफा र वितरणयोग्य नाफाबीच फरक देखिएको हो।

विशेषगरी, डिफर्ड ट्याक्स एसेटबापत ४३ करोड ३८ लाख रुपैयाँ नियामकीय प्रयोजनका लागि वितरणयोग्य नाफाबाट समायोजन गरिएको बैंकले जनाएको छ। वित्तीय विवरणमा नियामकीय रिजर्भसम्बन्धी प्रावधानअनुसार यसको हिस्सा वितरणयोग्य नाफामा गणना गर्न नपाइने भएकाले यस्तो समायोजन गरिएको हो।

बैंकको रिर्जभमा ८ अर्ब ८६ करोड १० लाख रुपैयाँ छ। बैंकको खुदब्याज आम्दानीमा सुधार भई छ अर्ब २९ करोड ३६ लाख रुपैयाँ पुगेको छ। यस्तै निष्क्रिय कर्जा अनुपात ५.८८ प्रतिशत छ। आधारदर ५.०४ र स्प्रेडदर ३.४८ प्रतिशत छ।

समीक्षा अवधिमा बैंकले २ खर्ब ३१ अर्ब ७३ करोड रुपैयाँ निक्षेप परिचालन गरी १ खर्ब ७० अर्ब १४ करोड रुपैयाँ कर्जा प्रवाह गरेको छ। बैंकको चुक्ता पुँजी १५ अर्ब ५० करोड रुपैयाँ छ।