तीन महिनादेखि आईपीओ स्वीकृति ठप्प, अनुमति माग्ने बढेको बढ्यै, थप चार कम्पनी थपिए

काठमाडौँः आईपीओ निष्काशनको अनुमति माग्दै नेपाल धितोपत्र बोर्ड अर्थात् सेबोनमा थप ४ कम्पनीले आवेदन दिएका छन्। मकरीगाड हाइड्रोपावर लिमिटेड, कालिञ्चोक इन्भेष्टमेन्ट कम्पनी लिमिटेड, इन्द्रेणी मसरुम फार्म लिमिटेड र मध्यपुर अस्पताल लिमिटेडले आईपीओ निष्काशनका लागि बोर्डमा आवेदन दिएका हुन्।

यी चारवटै कम्पनीले प्रतिकित्ता १०० रुपैयाँ अंकित मूल्यमा आईपीओ निष्काशन गर्ने गरी अनुमति मागेका छन्। कम्पनीहरूले साउन महिनामै आवेदन दिए पनि सेबोनले आफ्नो वेबसाइटमार्फत हालै मात्र आवेदनसम्बन्धी विवरण सार्वजनिक गरेको हो।

मकरीगाड हाइड्रोपावरले २२ लाख २७ हजार ५०० कित्ता आईपीओ निष्काशनका लागि साउन २२ गते आवेदन दिएको छ। कम्पनीको आईपीओ बिक्री प्रबन्धक सानिमा क्यापिटल लिमिटेड रहेको छ।

यस्तै, इन्द्रेणी मसरुम फार्मले ८ लाख ७५ हजार कित्ता आईपीओ निष्काशनका लागि साउन २२ गते नै आवेदन दिएको छ। कम्पनीको बिक्री प्रबन्धक मुक्तिनाथ क्यापिटल लिमिटेड रहेको छ।

मध्यपुर अस्पतालले पनि साउन २२ गते नै आईपीओ निष्काशनको अनुमति मागेको हो। अस्पतालले २८ लाख कित्ता आईपीओ निष्काशनका लागि आवेदन दिएको छ। यसको बिक्री प्रबन्धक पनि मुक्तिनाथ क्यापिटल लिमिटेड रहेको छ।

त्यसैगरी, कालिञ्चोक इन्भेष्टमेन्ट कम्पनीले २४ लाख कित्ता आईपीओ निष्काशनका लागि साउन २९ गते सेबोनमा आवेदन दिएको छ। कम्पनीको आईपीओ बिक्री प्रबन्धक नबिल इन्भेष्टमेन्ट बैंकिङ लिमिटेड रहेको छ।

यी ४ कम्पनीले कुल ८३ लाख २ हजार ५०० कित्ता आईपीओ निष्काशनका लागि अनुमति मागेका छन्। प्रतिकित्ता १०० रुपैयाँ अंकित मूल्यका आधारमा हेर्दा यी कम्पनीहरूले कुल ८३ करोड २ लाख ५० हजार रुपैयाँ बराबरको आईपीओ निष्काशन गर्ने तयारी गरेका छन्।

वैशाखपछि आईपीओ स्वीकृति रोकिएको अवस्था

तर, यी कम्पनीले आवेदन दिए पनि अहिलेसम्म आईपीओ निष्काशनको अनुमति भने पाइसकेका छैनन्। सेबोनले गत वैशाख २ गतेपछि नयाँ आईपीओ निष्काशनको स्वीकृति दिएको छैन।

बोर्डले प्राथमिक बजारमा सुधारका लागि विभिन्न नीतिगत योजना अघि सारेको छ। नीतिगत सुधार गरेपछि मात्रै नयाँ आईपीओ निष्काशनको अनुमति प्रक्रिया अघि बढाउने बोर्डले बताउँदै आएको छ।

यसकारण अहिले आवेदन दिएका मकरीगाड हाइड्रोपावर, कालिञ्चोक इन्भेष्टमेन्ट, इन्द्रेणी मसरुम फार्म र मध्यपुर अस्पतालको आईपीओ पनि तत्काल बजारमा आउने निश्चित छैन।

यी कम्पनीसँगै बोर्डमा आईपीओको अनुमति पर्खिरहेका कम्पनीको संख्या १०८ पुगेको छ ।