बाढीको प्रभावः नेप्से ३५ अंकले घट्यो, रसुवागढी हाइड्रोपावरमा नकारात्मक सर्किट

काठमाडौँः साताको तेस्रो कारोबार दिन बुधबार नेपाल स्टक एक्सचेञ्ज (नेप्से) परिसूचक उच्च अंकले घटेको छ। आज नेप्से परिसूचक ३५.९२ अंकले घटेर २ हजार ५५८ विन्दुमा झरेको छ।

नेप्से घटे पनि आज कारोबार रकम भने बढेको छ। नेप्सेका अनुसार आज ४ अर्ब ६९ करोड रुपैयाँ बराबरको कारोबार भएको छ। यस क्रममा १ करोड ३५ हजार कित्ता सेयर खरिद–बिक्री भएको छ।

आज कारोबारमा आएका कम्पनीमध्ये २३ वटा कम्पनीको सेयर मूल्य बढेको छ भने २५२ कम्पनीको सेयर मूल्य घटेको छ। त्यस्तै, ३ कम्पनीको सेयर मूल्य स्थिर रहेको छ।

भोटेकोशी नदीमा आएको बाढीको प्रभाव सेयरबजारमा समेत देखिएको छ। बाढीका कारण विशेषगरी हाइड्रोपावर तथा निर्जीवन बीमा कम्पनीका सेयरमा भारी गिरावट आएको छ।

बजारमा कारोबार भइरहेका १११ हाइड्रोपावर कम्पनीमध्ये १०८ कम्पनीको सेयर मूल्य घटेको छ। त्यस्तै, सबै निर्जीवन बीमा कम्पनीको सेयर मूल्यमा समेत गिरावट आएको छ।

भोटेकोशीमा आएको बाढीले जलविद्युत् आयोजनामा क्षति पु¥याउने जोखिम बढेपछि लगानीकर्ता थप सतर्क बनेका छन्। बाढीका कारण जलविद्युत् कम्पनीका आयोजना तथा भौतिक संरचनामा हुन सक्ने क्षतिको जोखिमले हाइड्रोपावर कम्पनीका सेयरमा बिक्री चाप बढेको देखिएको छ।

यता, सम्भावित क्षतिका कारण बीमा दाबी बढ्न सक्ने अनुमानले निर्जीवन बीमा कम्पनीका सेयरमा समेत बिक्री चाप बढेको देखिएको छ।

आज सर्वोत्तम पेन्ट्स इन्डष्ट्रिजको सेयर मूल्यमा सकारात्मक सर्किट लागेको छ। यता, रसुवागढी हाइड्रोपावरको सेयर मूल्य सबैभन्दा धेरै घट्दै नकारात्मक सर्किट लागेको छ।

कारोबार रकमका आधारमा भने चिलिमे हाइड्रोपावर कम्पनी अगाडि रहेको छ। कम्पनीको मात्रै २० करोड ५६ लाख रुपैयाँ बराबरको सेयर कारोबार भएको छ।