कामना सेवा विकास बैंक र कर्मचारीको संयुक्त पहलः बाढीपीडितका लागि २५ लाख सहयोग

काठमाडौँः रसुवाको भोटेकोशी नदीमा आएको बाढीबाट प्रभावित नागरिकको राहत, उद्धार तथा पुनःस्थापनाका लागि कामना सेवा विकास बैंक र बैंकका कर्मचारीले संयुक्त रूपमा २५ लाख रुपैयाँ आर्थिक सहयोग गरेका छन्।

बैंकको सञ्चालक समितिको निर्णयअनुसार संस्थागत सामाजिक उत्तरदायित्वअन्तर्गत १० लाख रुपैयाँ उपलब्ध गराइएको छ भने बैंकमा कार्यरत कर्मचारीको एक दिनको तलबबाट १५ लाख रुपैयाँ संकलन गरिएको हो। यसरी बैंक र कर्मचारीको संयुक्त पहलबाट कुल २५ लाख रुपैयाँ सहयोग जुटाइएको बैंकले जनाएको छ।

उक्त रकम प्रधानमन्त्री दैवी प्रकोप उद्धार कोषमा जम्मा गरिएको छ। सहयोग रकमले प्राकृतिक विपद्बाट प्रभावित परिवार तथा समुदायको तत्कालीन आवश्यकता सम्बोधन गर्न तथा राहत र उद्धार कार्यमा सहयोग पुग्ने बैंकको विश्वास छ।

बैंकले बाढी तथा प्राकृतिक विपद्का कारण ज्यान गुमाउनेहरूप्रति हार्दिक श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गरेको छ। साथै, घाइतेहरूको शीघ्र स्वास्थ्यलाभको कामना गर्दै प्रभावित नागरिकको सुरक्षित र सहज जीवनयापनका लागि शुभेच्छा प्रकट गरेको छ।

कामना सेवा विकास बैंकले संस्थागत सामाजिक उत्तरदायित्वअन्तर्गत विपद् प्रभावित समुदाय, मानवीय सहायता तथा सामाजिक हितका क्षेत्रमा निरन्तर सहयोग गर्दै आएको जनाएको छ।

विपद्को यस कठिन घडीमा उद्धार, राहत तथा व्यवस्थापन कार्यमा खटिएका सुरक्षाकर्मी, सरकारी तथा गैरसरकारी निकाय, स्थानीय तह, स्वयंसेवक तथा अन्य सहयोगीप्रति बैंकले कृतज्ञता व्यक्त गरेको छ। प्रभावित समुदायको राहत र पुनःस्थापनाका लागि सबै सरोकारवाला पक्षबीच समन्वय, सहकार्य र मानवीय सहयोग आवश्यक रहेको भन्दै बैंकले सहयोगका लागि जुट्न समेत आह्वान गरेको छ।