शारडा ग्रुपद्वारा बाढी पीडितलाई १ करोड १ लाख सहयोग

काठमाडौँः रसुवाको भोटेकोशी नदीमा आएको विनाशकारी बाढीबाट प्रभावित नागरिकको राहत, उद्धार तथा पुनःस्थापनाका लागि शारडा ग्रुपले नगद सहयोगसँगै खाद्य सामग्री, अक्सिजन र पुनर्निर्माणका लागि सिमेन्ट उपलब्ध गराउने भएको छ।

ग्रुपले रसुवा, नुवाकोट, धादिङ तथा आसपासका बाढीपहिरो प्रभावित जिल्लाका नागरिकका लागि प्रधानमन्त्री दैवी प्रकोप उद्धार कोषमा एक करोड एक लाख रुपैयाँ सहयोग गरेको छ। ग्रुपका अध्यक्ष शिवरतन शारदाले सोमबार अर्थ मन्त्रालयमा उक्त रकम हस्तान्तरण गरेका हुन्।

ग्रुपअन्तर्गतका विभिन्न कम्पनीमार्फत उक्त रकम उपलब्ध गराइएको हो। पशुपति खाद्य तेल उद्योग प्रालिले ६१ लाख रुपैयाँ, पशुपति सिनप्याक इन्डस्ट्रिज प्रालिले १५ लाख रुपैयाँ, प्रिमियर वायर्स प्रालिले १५ लाख रुपैयाँ र प्रिमियर डिस्टिलरी लिमिटेडले १० लाख रुपैयाँ सहयोग गरेका छन्।

नगद सहयोगसँगै शारदा ग्रुपले करिब ६० लाख रुपैयाँबराबरका खाद्य तथा पेय पदार्थ पनि नेपाल सरकारलाई उपलब्ध गराएको जनाएको छ। गुडलाइफ तथा रमपमका विभिन्न खाद्य सामग्री, बिस्कुट र जुस प्रभावित तथा तत्काल सहयोग आवश्यक रहेका समुदायमा वितरण गरिनेछ।

त्यस्तै, राहत तथा उद्धार कार्यमा थप सहयोग पुर्‍याउने उद्देश्यले ग्रुपले प्रभावित जिल्लामा स्वास्थ्य उपचारका लागि आवश्यक अक्सिजन निःशुल्क उपलब्ध गराउने घोषणा गरेको छ। यसका लागि स्वास्थ्य तथा जनसंख्या मन्त्रालयसँग समन्वय गरिने बताइएको छ।

पुनर्निर्माणतर्फ पनि ग्रुपले सहयोगको घोषणा गरेको छ। शारदा ग्रुपद्वारा प्रवर्द्धित शिवम् सिमेन्ट लिमिटेडले बाढीबाट प्रभावित क्षेत्रमध्येको एक गाउँको पुनर्निर्माण तथा पुनःस्थापनाका लागि ११ हजार बोरा सिमेन्ट उपलब्ध गराउने भएको छ।

यसअघि शिवम् होल्डिङ्स लिमिटेडले पनि प्रधानमन्त्री दैवी प्रकोप उद्धार कोषमा २१ लाख रुपैयाँ छुट्टै सहयोग गर्ने घोषणा गरिसकेको छ।

बाढीबाट घाइते भएका व्यक्तिको उपचारका क्रममा रगतको अभाव हुन नदिन शारदा ग्रुपले काठमाडौं र विराटनगरमा रक्तदान कार्यक्रमसमेत आयोजना गरेको जनाएको छ।

ग्रुपले विपद्को कठिन समयमा नगद सहयोगमा मात्र सीमित नभई तत्काल राहत, स्वास्थ्य सेवा र दीर्घकालीन पुनर्निर्माणमा समेत सहयोग पुर्‍याउने उद्देश्यका साथ विभिन्न कार्यक्रम अघि बढाएको जनाएको छ।