कोशीको मुख्यमन्त्रीमा कांग्रेसका थापालाई अघि सार्ने गठबन्धनको निर्णय

काठमाडौँ- सत्तारुढ गठबन्धनको बैठकले कोशी प्रदेशमा नेपाली कांग्रेसको नेतृत्वमा सरकार गठन गर्ने निर्णय गरेको छ। सोमबार प्रधानमन्त्री निवास बालुवाटारमा बसेको बैठकले कोशीको नेतृत्व कांग्रेसलाई दिने निर्णय गरेको हो।

‘हामी गठबन्धनमा भएको दलहरुको तर्फबाट नेपाली कांग्रेस संसदीय दलको नेता उद्धव थापालाई मुख्यमन्त्रीमा अगाडि सार्न सल्लाह दिने निर्णय भएको छ,’ एकीकृत समाजवादीका कार्यवाहक अध्यक्ष राजेन्द्र पाण्डेले भने।

संविधानको धारा १६८ को उपधार २ अनुसार कोशीमा दुई वा दुई भन्दा बढी दलको समर्थन जुटाएर मुख्यमन्त्रीका लागि दाबी पेस गर्न आइतबार प्रदेश प्रमुख परशुराम खापुङले ५ दिनको समय दिएर आह्वान गरेका छन्।

गत शुक्रबार प्रदेश सभामा विश्वासको मतका लागि प्रस्ताव गरेका मुख्यमन्त्री हिक्मतकुमार कार्कीले एक मत पुर्‍याउन नसकेपछि पदमुक्त भएपछि प्रदेश प्रमुखले नयाँ मुख्यमन्त्री बनाउने प्रक्रिया अघि बढाएका हुन्।

९३ सदस्यीय प्रदेशसभामा बहुमतका लागि ४७ जना सांसदको समर्थन आवश्यक हुन्छ। कोशीमा एमालेका ४० जना सांसद् छन्। शुक्रबार मुख्यमन्त्री कार्कीले एमालेका ४० र राप्रपाका ६ सांसद गरी ४६ जनाले कार्कीलाई विश्वासको मत दिएका थिए।

कांग्रेससहितको गठबन्धनका पक्षमा कांग्रेसका २९, माओवादीका सभामुखबाहेक १२, नेकपा एकीकृत समाजवादीका ४ र जसपाका १ गरी ४६ सांसद छन्। गठबन्धन दलको समर्थन पाएपनि थापालाई मुख्यमन्त्रीमा दाबी पेस गर्नका लागि एक मत पुग्दैन। यस्तो अवस्थामा उसले राप्रपाको समेत समर्थन लिनुपर्ने हुन्छ। तर औपचारिक रूपमा गठबन्धनका कुनै पनि घटकले आफ्नो दलसँग कुराकानी नगरेको राप्रपाले बताएको छ।