सिंहदरबारमा अखडा जमाएका कर्मचारीलाई अन्यत्र पठाइन्छ : मन्त्री मोदी

काठमाडौँ- सङ्घीय मामिला तथा सामान्य प्रशासनमन्त्री अमनलाल मोदीले सिंहदरवारमा अखडा जमाइरहेका कर्मचारीको सरुवा गरेर बाहिर पठाइने बताएका छन्।  शुक्रबार भएको राज्य व्यवस्था तथा सुशासन समितिको बैठकमा मन्त्री मोदीले यस्तो बताएका हुन्।

‘तीन सयभन्दा बढी स्थानमा लामो समयसम्म निमित्तको जिम्मेवारीमा रहेका स्थानीय तहमा कर्मचारी व्यवस्थापनको काम भइरहेको छ। कर्मचारी सरुवा मापदण्ड बनाउने कार्यलाई पनि मन्त्रालयले प्राथमिकतामा राखेको छ,’ मन्त्री मोदीले भने, ‘सिंहदरवारमा अखडा जमाइरहेका कर्मचारीलाई अन्यत्र पठाइन्छ। यो काम सुरु भइसकेको छ।’

मधेस प्रदेशका स्थानीय तहमा निमित्तबाट चलाउने कार्य शून्यमा झारिएको जानकारी दिएका उनले सिंहदरबारलाई लामो समयदेखि अखडा बनाएर बसेका केही कर्मचारीको सरुवा र जिम्मेवारी पनि ज्येष्ठता तथा क्षमताका आधारमा अन्यत्र हुने स्पष्ट गरेका हुन्।

बैठकमा सङ्घीय निजामती सेवा ऐनको मस्यौदा गरी सहमतिका लागि कानुन, न्याय तथा संसदीय मामिला मन्त्रालयमा पठाइएको उनले जानकारी दिए।  कानुनबाट सहमति प्राप्त भएपछि यथाशीघ्र मन्त्रिपरिषदमा लैजाने उनको भनाइ छ।

सरकारले अर्थतन्त्र सुधार, जनजीविकाका मुद्दा तथा विकास र समृद्धिको विषयलाई पनि उच्च महत्व दिएको जनाउँदै मन्त्री मोदीले देशमा पछिल्ला समय भएका विभिन्न घटनाका सम्बन्धमा सरकारले निष्पक्ष छानबिनका लागि निर्देशन दिँदै वातावरण बनाइरहेको बताए।

यसअघि बैठकमा समितिका सदस्य सांसदले सङ्घीय निजामती ऐन, सुन प्रकरण लगायतका घटना तथा भ्रष्टाचारसँग जोडिएका विषयका सम्बन्धमा जिज्ञासा राखेका थिए।