प्रधानमन्त्री प्रचण्ड र मोदीबीच फोनवार्ता, द्विपक्षीय समझदारीबारे कुराकानी

काठमाडौँ- प्रधानमन्त्री पुष्पकमल दाहाल प्रचण्ड र भारतीय प्रधानमन्त्री नरेन्द्र मोदीबीच टेलिफोन कुराकानी भएको छ।

भारतीय प्रधानमन्त्री मोदीले टेलिफोन गरेपछि दुई नेताबीच द्विपक्षीय हितका विभिन्न विषयमा कुराकानी भएको भारतको प्रधानमन्त्री कार्यालयले सूचनामार्फत जानकारी दिएको छ। टेलिफोनमा प्रधानमन्त्री प्रचण्डको भारत भ्रमणका क्रममा भएका द्विपक्षीय समझदारीका विषयमा कुराकानी भएको बताइएको छ।

नेपालको प्रधानमन्त्री कार्यालयले पनि दुवै देशका प्रधानमन्त्रीबीच कुराकानी भएको जानकारी दिएको छ।

‘पुष्पकमल दाहाल ‘प्रचण्ड’ ले भारतका प्रधानमन्त्री नरेन्द्र मोदीसँग शनिबार टेलिफोन संवाद गर्नुभएको छ। संवादमा नेपाल-भारत सम्बन्ध र प्रधानमन्त्रीको भारत भ्रमणका क्रममा भएका महत्त्वपूर्ण समझदारीहरूको कार्यान्वयनको प्रगतिबारे गहन कुराकानी भएको छ,’  कार्यालयले ट्विट गरेको छ।

भारतीय प्रधानमन्त्रीसँगको टेलिफोन वार्ताले दुई देशबीचको उच्चस्तरीय आदानप्रदानको परम्परालाई निरन्तरता दिएको प्रधानमन्त्री कार्यालयको भनाइ छ।