कपनमा विवाद कायमै, सही र गलत छुट्याउन नसक्ने मेयरले राजीनामा दिनु पर्ने स्थानीयको माग

काठमाडौं– काठमाडौं महानगरपालिकाले कपन खोलामाथि राखिएको स्ल्याब हटाएर खोलालाई स्वतन्त्र बग्न दिने प्रयास गरेपछि सुरु भएको विवाद शुक्रबार पनि जारी छ।

शुक्रबार पनि काठमाडौं महानगरपालिका –७ स्थित कपन खोलामाथि राखिएको स्ल्याब हटाउन काठमाडौं महानगरपालिकाको नगरप्रहरीको टोली कपनको साततले पुगेको छ। तर, काठमाडौं महानगरपालिकाको कदममा कपनवासी विभाजित भएका छन। केही स्थानीयवासीले महानगरको कदमको पक्षमा देखिँदा केही भने विरोधमा उत्रिएका छन्।

केही स्थानीयवासीले खोलाले आंँखा देख्नु पर्ने धारणा राख्दै खोलाको व्यवस्थापन गर्दा कोही पीडित भए नगरपालिकाले हेर्नुपर्ने बताएका छन्।

केहीले भने कपनमा सही र गलत के हो भन्ने नै छुट्याउन नसकिएको बताए । धरमरमा परेर बस्नु भन्दा स्थानीय तहका जनप्रतिनिधिले राजीनामा गर्नु नै उचित हुने उनीहरुको भनाइ छ।
‘यो हिजो हालेको ढल निकाल्ने दुई साईटबाट बाटो बनाएर खोलाको मापदण्ड कति छ त्यो अनुसार बनाएर जाउ त्यो मैले बुझेको छु। सहीलाई सही र गलतलाई गलत भन्न सक्दैनन् भने पदमा भएकाहरुले आजै राजीनामा दिए भईहाल्यो नी,’ एक स्थानीयले भने।

यस्तै अर्का एक स्थानीयले वस्ती बढ्दै गएपछि कपनमा समस्या पनि बढ्दै गएको बताए। उनले भने ‘‘खहरमो स्थानीय मिलेर हिमपाईप राखे। त्यो वेला बस्ती थोरै थियो । केही परक परेको थिएन्। जब बस्ती बढ्दै गयो तब खतरा पनि बढ्दै गयो,’ उनले भने।
विहिबार स्ल्याब हटाउन गएको महानगरको नगरप्रहरी र स्थानीयबीच झडप समेत भएको थियो । स्थानीयको विरोध पछि डोजर चल्न दिइएको थिएन्।