कांग्रेसको पोलिसी ह्याकाथन : २२६ टोलीलाई पछि पार्दै मन्दिप, अमित र विप्लवीको समूह विजयी

काठमाडौँ- नेपाली कांग्रेसले आयोजना गरेको पोलिसी ह्याकाथनमा मन्दिप सुवेदी, अमित खनाल र विप्लवी न्यौपानेको समूह विजयी भएको छ। शनिबार भएको ह्याकाथनको अन्तिम चरणमा उनीहरूको समूह विजयी बनेको घोषणा गरिएको हो।

नीति निर्माणमा युवालाई जोड्ने उद्देश्यले आयोजना गरेको पोलिसी ह्याकाथन कार्यक्रमको आयोजना गरिएको हो। सहभागी भएका २२७ टिममध्ये उनीहरूको समूह सर्वोत्कृष्ट बनेको हो।

यसअघि उत्कृष्टमा १० समूह छनौट भएका थिए। छनौट भएका १० समूहको अवधारणा सुनेपछि निर्णायक मण्डलीले गिग इकोनोमीमा अवधारणा तयार पारेका विप्लवीसहितको समूहलाई विजेता घोषणा गरेको थियो। उनीहरूले नगद तीन लाख रुपैयाँ पुरस्कार प्राप्त गरेका छन्।

त्यस्तै, गिग इकोनोमीकै सन्दर्भमा नीतिपत्र तयार पारेका सदीक्षा सिलवाल, स्वीकृति कटुवाल र मिलनजंग कटुवालको समूह दोस्रो र जलवायु परिवर्तन विषयमा ऐश्वर्या श्रेष्ठ, सौम्या पहाडी, उपेन्द्र अमात्यको समूह तेस्रो भएका भए। द्वितीय र तृतीय हुनेहरूले क्रमशः डेढ लाख र ५० हजार रुपैयाँ नगदसहित प्रशंसापत्र प्राप्त गरे।

विजेताहरूलाई कांग्रेस सभापति शेरबहादुर देउवाले पुरस्कृत गरे। ह्यायाकाथनका माध्यमबाट नयाँ पुस्ताका युवाले जलवायु परिवर्तन र गिग इकोनोमीका विषयमा दिएको सिर्जनात्मक नीति पत्रहरूलाई कांग्रेसले व्यवहारमा लागू गर्नेबारे छलफलको विषय बनाउने बताएको छ।

सर्वोत्कृष्ट समूह छान्न कांग्रेसले अर्थशास्त्री समीर खतिवडा, प्राकृतिक सम्पदा विज्ञ सन्तोषमणि नेपाल, जलवायु विज्ञ रिता सिंह, प्राध्यापक राजेश राई, शिक्षक नरोत्तम अर्याल, सुशासन तथा नेतृत्व विज्ञ पुकार मल्ल र शिक्षक स्वस्तिका श्रेष्ठलाई समावेश गरेर निर्णायक मण्डल बनाएको थियो।