हजारौं सहिदको सपना पूरा गर्ने जिम्मेवारी काँधमा छ : प्रधानमन्त्री

गोरखा-  प्रधानमन्त्री पुष्पकमल दाहाल `प्रचण्ड´ ले सुरेश वाग्ले `वासु´ लगायत हजारौं सहिदहरूको सपना पूरा गर्ने जिम्मेवारी काँधमा रहेको बताएका छन्। सुरेश वाग्लेले अध्यापन गराउनु भएको श्री जनता माध्यमिक विद्यालयमा आयोजित सहिद सुरेश वाग्ले (वासु) र भीमसेन पोख्रेलको २४औं स्मृति सभा तथा सालिक अनावरण कार्यक्रमलाई सम्बोधन गर्दै उनले उक्त कुरा बताएका हुन्।

जनयुद्धका सहिदहरूलाई स्मरण गर्दै माओवादीले उठाएका मुद्दा र जनताको चाहाना पूरा गर्न अझै बाँकी रहेको उनको भनाइ थियो। प्रधानमन्त्री प्रचण्डले आफू प्रधानमन्त्री बनेपछि सरकारले जनयुद्ध र जनयुद्धका सहिद बेपत्ता र योद्धालाई सम्मान गर्ने वातावरण बनाएको जिकिर गरे। जनयुद्ध र जनआन्दोलनका सम्पूर्ण सहिदहरूलाई राष्ट्रिय सहिदको घोषणा गरेर राजपत्रमा प्रकाशित गरी जनयुद्ध दिवसलाई राष्ट्रिय दिवस घोषणा गरिएको उनको भनाइ थियो।

अहिले सत्य निरोपण तथा बेपत्ता सम्बन्धी विधयेक प्रक्रियामा रहेको बताउँदै पारित भएपछि देशैभर सहिद बेपत्ता परिवारको सम्मान हुने बताए। महान् सहिद  गुरु क.सुरेश वाग्ले (वासु) र क. भिमसेन पोख्रेल (बैरागी) को २४ औं स्मृति दिवसको अवसरमा आयोजित कार्यक्रममा सहभागी हुन प्रधानमन्त्री गोर्खा पुगेका हुन्।

सहिद वासु २०१० सालमा गोरखा जिल्लाको आँपपिपल गा.वि.स ५ रातडाँडामा एक किसान परिवारमा जन्मिएका थिए। २०५६ भाद्र २३ गते गोर्खा जिल्लाको गाँखुमामा उनको हत्या भएको थियो।