मलंगवामा कर्फ्यू हटाएर निषेध आदेश

मलंगवा- सर्लाहीको मलंगवामा शनिबार साँझ ५ देखि लागू गरिएको कर्फ्यू हटाएर निषेध आदेश जारी गरिएको छ। आइतबार बिहान ८ बजेसम्मका लागि लागू गरिएको कर्फ्यू हटाएर निषेध आदेश लागू गरिएको हो।

कर्फ्यु हटाइएपनि विवाद साम्य भइनसकेकाले निषेध आदेश जारी गरिएको जिल्ला प्रशासन कार्यालय सर्लाहीले जानकारी दिएको छ। आइतबार बिहान ८ बजेदेखि लागू भएको निषेध आदेश भदौ २७ गते राति १२ बजेसम्म लागू हुने कार्यालयले जानकारी दिएको छ।

मलंगवा नगरक्षेत्र, पूर्वमा भीम नदी, पश्चिममा मुसैली नहर, दक्षिणमा नेपाल भारत सीमा क्षेत्र र उत्तरमा प्रहरी पोष्ट वा पेट्रोलपम्मसम्मको क्षेत्रमा निषेध आदेश लागू गरिएको छ। निषेधित क्षेत्र तोकिएको स्थानमा भेला र सभा सम्मेलन गर्न पाइने छैन।

कृष्णाष्टमीको मूर्ति विसर्जनका क्रममा शुक्रबार दुई समुदायबीच झडप भएको थिय। प्रहरीले झडप नियन्त्रणमा लिन शनिबार दिउँसो प्रहरीले १३ सेल अश्रुग्यास र पाँच राउण्ड हवाइ फायर गरेको थियो।

आदेशको उल्लंघन गर्नेलाई सुरक्षामा खटिएका सुरक्षाकर्मीले आवश्यकता अनुसार बल प्रयोग गरी कानून बमोजिम कारबाही समेत गर्न सक्ने चेतावनी दिइएको छ।