अस्पताल पुर्‍याउँदा नेम्वाङको आँखा फुलिसकेको थियो, रक्तचाप र पल्स रेकर्ड गर्न सकिएन : टिचिङ अस्पताल

काठमाडौं- संविधानसभाका अध्यक्ष, पूर्वसभामुख तथा एमाले उपाध्यक्ष सुवासचन्द्र नेम्वाङलाई मंगलबार राति १:५० मा त्रिवि शिक्षण अस्पताल महाराजगञ्ज पुर्‍याइएको थियो। शिक्षण अस्पतालका अनुसार चिकित्सकले जाँच गर्दा उनको जीवन सम्बन्धी कुनै चाल देखिएको थिएन।

अस्पतालले मंगलबार दिउँसो विज्ञप्ति जारी गर्दै नेम्वाङको निधनसम्बन्धी स्पष्ट पारेको हो। अस्पताल पुर्‍याउँदा नेम्वाङको आँखाको नानी फुलिसकेको थियो। जाँच गर्दा रक्तचाप र पल्सको रेकर्ड गर्न नसकिएको शिक्षण अस्पतालले जनाएको छ।

‘त्यसबखत उहाँको आँखाको नानी पुलिसकेको थियो, बिपी र पल्स अनरेकर्डएबल भएकाले चिकित्सकले ३५ मिनेटसम्म सिपिआर गर्दा पनि जीवन सम्बन्धी कुनै संकेतहरू देखिएन,’ अस्पतालका निमित्त निर्देशक डा. सन्तकुमार दासले जारी गरेको विज्ञप्तिमा भनिएको छ।

जीवन सम्बन्धी कुनै संकेतहरू नदेखिएपछि ३ बजे मृत घोषणा गरिएको दासले विज्ञप्तिमा उल्लेख गरेका छन्।

ज्वरो र रुघाखोकी लागेर घरमै आराम गरिरहेका नेम्वाङ राति शौचालयमा लडिरहेको अवस्थामा फेला परेका थिए। परिवारका सदस्यले तुरुन्तै त्रिवि शिक्षण अस्पताल पुर्‍याएका थिए।

CamScanner 09-12-2023 10.59