दुई दिनमै रित्तियो सुपथ मूल्य पसलको चिनी

काठमाडौँ- सरकारले सञ्चालनमा ल्याएको चाडपर्वलक्षित सुपथ मूल्य पसलमा चिनीको चरम अभाव देखिएको छ। आइतबारदेखि सुरु भएको सुपथ मूल्य पसलमा सोमबार नै चिनी रित्तिएको हो।

प्रतिउपभोक्ता २ केजी मात्र बिक्री गर्दै आएको चिनी सोमबारदेखि उपभोक्ताले किन्न नपाउने भएका छन्।

खाद्य व्यवस्था तथा व्यापार कम्पनीले सञ्चालनमा ल्याएको सुपथ मूल्य पसलमा सोमबार दिउँसोसम्म मात्र चिनीको बिक्री वितरण हुने अवस्था छ।

सुपथ मूल्य पसल सुरु भएको दुई दिन नबित्दै चिनीको मौज्दात सकिइसकेको कम्पनीले जनाएको हो।

‘सुपथ मूल्य पसलमा चिनीको ‘स्टक’ सकिइसकेको छ,’ खाद्य व्यवस्था तथा व्यापार कम्पनीका सूचना अधिकारी शर्मिला सुवेदी न्यौपानेले भनिन्, ‘चिनी आजै सकिन्छ।’

कम्पनीले चिनी खरिदका लागि प्रक्रिया अघि बढाए पनि दसैंअघि चिनी नआउने पक्कापक्की छ।

सार्वजनिक खरिद प्रक्रियामार्फत आउने १० हजार मेट्रिक टन चिनी नआउँदा चाडपर्वकै बेला चिनीको चरम अभाव हुने देखिएको छ। उक्त चिनी तिहारपछि नै आउने सम्भावना देखिएको उनले बताइन्।

७/८ क्विन्टलकै हाराहारीको चिनी सुपथ मूल्य पसलमा बिक्रिका लागि राखिएको थियो। सुपथ मूल्य पसलमा उपभोक्तालाई केही भए पनि सम्बोधन गर्ने हिसावले मात्रै चिनी राखिएको उनले बताइन्।

साल्टको आशमा सरकारी कम्पनी
सार्वजनिक खरिद प्रक्रियाअनुसार खाद्य कम्पनीको चिनी नआउने भएपछि अब साल्ट ट्रेडिङ कर्पोरेसनको भर पर्नुपर्ने अवस्था आएको छ।

‘साल्ट ट्रेडिङ चिनी ल्याउन सक्यो भने हामीले उहाँहरुसँग समन्वय गरेर हाम्रा बिक्री केन्द्रहरुमा पनि राखेर उपभोक्तालाई सुविधा दिने हाम्रो उद्देश्य छ,’ न्यौपानेले बताइन्।

तर, साल्टको चिनी कहिले आइपुग्छ, त्यो भने यकिन छैन। यद्यपि, सरकारी कम्पनीको जस्तो सम्पूर्ण सार्वजनिक खरिद प्रक्रिया अवलम्बन गर्नु नपर्ने भएकाले साल्टले छिटोछरितो रुपमा चिनी आपूर्ति गर्न सक्ने अवस्था छ।

कति ल्याउँदैछ साल्टले चिनी?
साल्टले गत २०८० असोज ६ गते १० हजार मेट्रिक टन चिनी खरिदका लागि टेन्डर गरेको छ। उक्त चिनी आउन न्यूनतम २१ दिन लाग्छ।

त्यस्तै, साल्टले ९०० मेट्रिक टन चिनी स्वदेशबाट नै खरिद गर्न १५ सेप्टेम्बर २०२३ नै टेन्डर गरेको थियो। उक्त चिनी आउने प्रक्रियामा छ।

अहिले साल्टले आफ्नो बिक्री केन्द्रबाट सुपथ मूल्य पसलमा प्रतिउपभोक्ता २ केजीका दरले चिनी बिक्री गरिरहेको छ। साल्टले थप चिनी नल्याउने हो भने बजारमा हाहाकार हुने देखिन्छ।

व्यापार कम्पनीको मूल्यसूची

साल्टले भने सुपथ मूल्यको चिनी एक हप्तासम्मका लागि पुग्ने प्रक्षेपण गरेको छ। त्यसपछि भने खरिद प्रक्रियाको चिनी भित्रिने साल्टका प्रवक्ता कुमारराज भण्डारी बताउँछन्।

सरकारले चिनी आयातमा कोटा प्रणाली लागू गरेको र भारतले निर्यात प्रतिबन्ध लगाएसँगै नेपालमा चिनीको आपूर्ति निकै कम भइरहेको छ।

चाडपर्वका बेला बढी चिनीको खपत बढी हुने भए पनि बजारमा अभाव देखिएकाले यसपालि उपभोक्ताले अभाव झेल्नुपर्ने बाध्यता आउन सक्ने देखिएको छ।

कहाँ-कहाँ छ सुपथ मूल्य पसल?
काठमाडौं उपत्यकामा खाद्य व्यवस्था तथा व्यापार कम्पनी लिमिटेड, साल्ट ट्रेडिङ र दुग्ध विकास संस्थानका बिक्री केन्द्र र तीनवटा घुम्ती पसल गरी ३५ स्थान सुपथ मूल्य पसल चल्नेछन्।

खाद्य व्यापार कम्पनीले ४२ जिल्लाका ४८ स्थानमा सुपथ मूल्य पसल सञ्चालन गर्ने तयारी गरेको जनाएको छ।

उपत्यकाभित्र रामशाहपथ, थापाथली, नख्खु र भक्तपुरको सूर्यविनायक तथा विभिन्न जिल्लामा रहेका बिक्री कक्षबाट सहुलियत दरमा खाद्यान्न उपलब्ध हुनेछ।

यस्तै साल्ट्र ट्रेडिङले काठमाडौं उपत्यकाका सतुंगल, कालीमाटी, पाटन, जडीबुटी, कौशलटार, भक्तपुर र सिफलसहित देशभरका कार्यालयमा सहुलियत पसल सञ्चालन गर्नेछ।

सुपथ मूल्य पसल मोरङ, झापा, ताप्लेजुङ, संखुवासभा, सोलुखुम्बु, दिक्तेल, भोजपुर, ओखलढुंगा, खोटाङ, सिरहा, जनकपुर, पर्सा, कास्की, तनहुँ, गोरखा, मनाङ, मुस्ताङ, रुपन्देही, बाँके, दाङ, बर्दिया, रुकुम–पूर्व र रुकुम–पश्चिममा पनि सञ्चालन हुनेछन्।

यस्तै रोल्पा, सुर्खेत, गुल्मी, दैलेख, डोल्पा, कालीकोट, हुम्ला, जाजरकोट, जुम्ला, मुगु, कैलाली, डडेल्धुरा, बाजुरा, बझाङ, अछाम, दार्चुला, महेन्द्रनगरमा पनि सुपथ मूल्य पसल रहनेछन्।

साल्टको मूल्यसूची