उद्योगीको मनोबल उकास्न उद्योगीमन्त्रीलाई परिसंघको आग्रह

काठमाडौँ- नेपाल उद्योग परिसंघले उद्योग, वाणिज्य तथा आपूर्तिमन्त्री रमेश रिजाललाई उद्योगी/व्यवसायीको मनोबल उकास्ने काम गर्न आग्रह गरेको छ। नेपाल उद्योग परिसंघका अध्यक्ष विष्णुकुमार अग्रवाल नेतृत्वको परिसंघ टोलीले नवनियुक्त मन्त्री रिजाललाई बधाई तथा शुभकामना दिँदै विद्यमान समस्या समाधानका विषयमा छलफल गरेको हो।

परिसंघका अध्यक्ष अग्रवालले मागमा आएको उच्च संकुचन, उच्च ब्याजदर, लगानी योग्य पूँजीको अभावलगायतका कारणले उद्योगी व्यवसायीको मनोबल निकै खस्किएको र अर्थतन्त्र सुधारका लागि उद्योगी व्यवसायीहरुको मनोबल बढाउन आवश्यक रहेको बताएका थिए।

मागमा आएको उच्च संकुचनका कारण नयाँ लगानीका योजना ठप्प भएको, मनोबल निकै खस्किएकाले यसबाट निकास दिनुपर्ने उनले सुझाव दिएको थियो।

कुल गार्हस्थ्य उत्पादन (जीडीपी) मा उत्पादनमूलक उद्योगको योगदान निरन्तर घट्दो रहेको भन्दै अध्यक्ष अग्रवालले अर्थतन्त्रमा उत्पादनमुलक उद्योगहरुको योगदान बढाउन वातावरण बनाउनुपर्नेमा जोड दिए।

परिसंघले औद्योगिकीकरणलाई बढावा दिन सरकारसँगको सहकार्यमा अगाडि बढाइरहेको ‘मेक इन नेपाल– स्वदेशी’ अभियानका बारेमा जानकारी दिएका थिए। परिसंघले आयात प्रतिस्थापन गर्ने उद्योगहरुलाई प्रोत्साहन गर्न, चालु आर्थिक वर्षको बजेटमा घोषणा गरिएको औद्योगिक क्षेत्र सार्वजनिक निजी साझेदारीमा अगाडि बढाउन पनि आग्रह गरेको छ।

उद्योगमन्त्री रिजालले वर्तमान अर्थतन्त्रको समस्या समाधान गर्न निजी क्षेत्रको साथ चाहिएको बताएका थिए। मुलुकलाई संमृद्धि बनाउन निजी क्षेत्रलाई प्रोत्साहन नगरी नहुने मन्त्री रिजालले बताएका थिए।

‘म निजी क्षेत्रको साथमा छु। निजी क्षेत्रको समस्या समाधान गर्न पूर्ण रुपमा लाग्नेछु, चिन्ता नगर्नुहोस्,’ उनले भने। त्यसका लागि परिसंघसँग सहकार्य गर्ने मन्त्री रिजालले प्रतिवद्धता व्यक्त गरेका थिए।

नवनियुक्त उद्योग, वाणिज्य तथा आपूर्तिमन्त्री रिजाललाई वरिष्ठ उपाध्यक्ष राजेशकुमार अग्रवाल, उपाध्यक्षहरु विरेन्द्रराज पाण्डे, हेमराज ढकाल, रोहित गुप्ता, परिसंघ गभर्निङ्ग काउन्सिल सदस्य शिवरतन शारडा, परिसंघका महानिर्देशक दीपकराज जोशीलगायतले भेटेका थिए।