गाजामा अस्पताल आक्रमणप्रति नेपालको निन्दा, शान्तिपूर्ण समाधान खोज्न आग्रह

काठमाडौं- प्यालेस्टाइनी क्षेत्र गाजाको अस्पतालमा भएको आक्रमणप्रति नेपालले दुख व्यक्त गरेको छ। परराष्ट्र मन्त्रालयले बिहीबार विज्ञप्ति जारी गर्दै निर्दोष नागरिकको हत्या भएकोमा नेपाल सरकार स्तब्ध भएको उल्लेख गरेको हो।

‘अस्पताल, स्वास्थ्यकर्मी, बिरामी र सर्वसाधारणमाथि भएको यस आक्रमणको हामी निन्दा गर्दछौं र शोकसन्तप्त परिवारजनमा हार्दिक समवेदना व्यक्त गर्दछौं,’ विज्ञप्तिमा उल्लेख छ, ‘घाइतेहरूको शीघ्र स्वास्थ्यलाभको कामना गर्दछौं।’

सर्वसाधारण नागरिकमाथिको आक्रमणबारे नेपाल गम्भीर रहेकोसमेत परराष्ट्रले जनाएको छ।

‘हामी सबै परिस्थितिमा नागरिक जनताको सुरक्षाको लागि आह्वान गर्दछौं  हामी शान्तिमा विश्वास गर्छौं,’ विज्ञप्तिमा उल्लेख छ।

इजरायल र गाजा क्षेत्रमा सक्रिय हमास समूहविरुद्ध अघिल्लो शनिबारयता युद्ध जारी छ।

नेपालले यो विवादको शान्तिपूर्ण र वार्ताबाट समाधान गर्न आग्रह गरेको छ।

अघिल्लो शनिबार हमास आक्रमणमा परी इजरायलमा १४ सय जनाको मृत्यु भएको बताइएको छ भने इजरायलको आक्रमणमा परी गाजामा ३ हजार ७ सय व्यक्तिको मृत्यु भएको बताइएको छ।

बुधबार भएको अस्पताल आक्रमणमा मात्र कम्तीमा ५ सय व्यक्तिको मृत्यु भएको अन्तर्राष्ट्रिय समाचार माध्यमहरूले उल्लेख गरेका छन्। घाइतेको संख्या यकिन छैन।

इजरायलले उत्तरी गाजा क्षेत्र खाली गर्न चेतावनी दिएको छ।

उसको चेतावनीपछि ११ लाख मानिस प्रभावित भएका छन्। ६ लाखभन्दा बढी व्यक्ति घर छोडेर हिँडीसकेका छन्।

यसैबीच बिहीबार बेलायती प्रधानमन्त्री ऋषि सुनकले इजरायली प्रधानमन्त्री बेन्जामिन नेतान्याहुले तेलअबिब पुगेर भेट गरेका छन्। यसअघि अमेरिकी राष्ट्रपति जो बाइडेनले पनि नेतान्याहुसँग भेट गरेका थिए।

यो युद्धमा अमेरिका र बेलायत इजरायलको पक्षमा उभिएका छन्।