नागरिकतासँगै प्यान कार्ड दिन अर्थमन्त्रीलाई चेम्बरको सुझाव

काठमाडौं- नेपाल चेम्बर अफ कमर्सले नागरिकतासँगै प्यान कार्ड पनि उपलब्ध गराउने व्यवस्था गर्न अर्थमन्त्री डा. प्रकाशशरण महतलाई सुझाव दिएको छ। करको दायरा बढाउनका लागि नागरिकतासँगै प्यान कार्ड दिने व्यवस्था गर्नु उपयुक्त हुने चेम्बरको भनाइ छ।

सोमबार मन्त्रालयमा अर्थमन्त्रीसँग भेटका क्रममा चेम्बरका प्रतिनिधिहरूले अवैध व्यापार निरुत्साहित गरी करको दायरा ल्याउन, बिल लिने/दिने व्यवस्थालाई अनिवार्य गर्न माग गरेका थिए। पुँजीगत खर्च बढाएर तरलता व्यवस्थापन गर्न, रेमिट्यान्सलाई उत्पादनमूलक क्षेत्रमा लगानी हुने गरी प्रोत्साहित गर्ने व्यवस्था गर्न पनि सुझाव दिएको चेम्बरले जानकारी दिएको छ।

चेम्बर पदाधिकारीका सुझावपछि अर्थमन्त्री डा. महतले अर्थतन्त्रको पछिल्लो अवस्थालाई गम्भीरताका साथ लिएको बताउँदै बजेट र मौद्रिक नीतिको सफल कार्यान्वयनका लागि समन्वय गरिने जवाफ दिए।

‘अर्थतन्त्र चलायमान हुन सकेको छैन, यस विषयमा मैले गर्भनर महाप्रसाद अधिकारी लगायत सरोकारवाला निकायका सचिवहरुसँग पनि छलफल गरिरहेको छु,’ मन्त्री महतलाई उद्धृत गर्दै चेम्बरले भनेको छ।

चेम्बर अफ कमर्सका तर्फबाट अध्यक्ष राजेन्द्र मल्लसहित निवर्तमान अध्यक्ष राजेशकाजी श्रेष्ठ, वरिष्ठ उपाध्यक्ष कमलेशकुमार अग्रवाल, उपाध्यक्षहरु सुरेन्द्रकुमार श्रेष्ठ, दीपक श्रेष्ठ, दीपककुमार मल्होत्रा, उर्मिला श्रेष्ठलगायतका कार्यसमिति सदस्यहरु भेटमा सहभागी थिए।