सौराहा : दसैँअघि सुनसान, दसैँबिदामा गुलजार

दसैं बिदाका समयमा चितवनको पर्यटकीय नगरी सौराहाका होटल भरिभराउ छन्।

दसैंअघि सुनसान रहेका होटलदसैंपछि भरिभराउ भएपछि व्यवसायी उत्साहित भएका छन्। सौराहामा आन्तरिकसँगै भारतीय र तेस्रो मुलुकका पर्यटक पनि आएका छन्।

दसैं सुरू भएपछि अधिकांश होटल पर्यटकले भरिएको व्यवसायीले बताएका छन्।

क्षेत्रीय होटल संघ चितवन सौराहाका अध्यक्ष नरेश गिरीले पर्याप्त मात्रामा आन्तरिक तथा बाह्य पर्यटक नआउँदा निरास पर्यटन व्यवसाय चाडबाड सुरू भएसँगै पुनः आशावादी भएको बताए।

‘दसैंअघि सौराहा सुनसान जस्तै थियो,’ उनले भने, ‘पर्यटकीय सिजन सुरू भएसँगै पर्यटक बढ्न थालेका छन्।’

देशमा बढ्दो अर्थतन्त्रको समस्याले कतै आन्तरिक पर्यटकको संख्यामा पनि कमी आउने हो कि भन्ने चिन्तामा रहेका व्यवसायीलाई दसैंको माहोलले भने केही उत्साहित बनाएको गिरीले बताए।

उनले दसैंपछि सौराहाका सबै होटल पर्यटकले भरिभराउ भएको जानकारी दिए।

आन्तरिक तथा विदेशी पर्यटकको चहलपहल बढ्दै जाँदा सुस्ताउँदै गरेको सौराहाको पर्यटनलाई पुरानै लयमा फर्काउने राम्रो संकेत दिएको सौराहाका पर्यटन व्यवसायी वासु ढुंगाना बताउँछन्। उनले दसैंमा पर्यटकको आगमनले व्यवसायीलाई उत्साहित बनाएको बताए।

दसैंको टीकापछि सौराहामा झनै पर्यटक बढेका छन्। शुक्रबार साँझ सौराहामा थामिनसक्नु भीड थियो। सौराहाको ड्याम-साइटका रेस्टुरेन्ट तथा होटल भरिभराउ थिए। होटल हर्मिटेजका सौराहाका सञ्चालक रमेश रेग्मीले आन्तरिकसँगै सौराहामा बाह्य पर्यटक बढेको बताए।

उनले बाह्य पर्यटक आउने समय भएका कारण पनि सौराहामा चहलपहल बढेको भन्दै व्यवसायमा केही उत्साह थपेको बताए। उनका अनुसार रसिया, अमेरिका, क्यानडा, अस्ट्रेलिया लगायत देशबाट घुम्नका लागि पर्यटक यहाँ आएका छन्।

पछिल्लो समय नेपालीमा घुम्ने संस्कृतिको विकास भइरहेको छ। सौराहामा विदेशीभन्दा स्वदेशी पर्यटकको संख्या बढ्दो छ। दसैंका बेलामा घुम्नुपर्छ भन्ने मान्यताले पर्यटकीय क्षेत्र स्वदेशी पर्यटकले नै भरिराउँछ देखिन्छ।

आन्तरिक पर्यटक मिता आचार्यले दसैं बिदाको समय पारेर सौराहा घुम्न आएको बताइन्।

‘निकुञ्जमा जिप सफारी र राप्ती नदीमा डुंगा सयर गर्‍यौं,’ उनले भनिन्।

त्यस्तै अमेरिकाबाट घुम्न आएका पर्यटक एन्जेलाले चितवन निकुञ्जका वन्यजन्तुले र चराचुरूंगीले मन लोभ्याएको बताइन्। यहाँको प्राकृतिक वातावरणमा घुम्न पाउँदा मन आनन्दित भएको पनि उनले बताइन्।

सौराहा वरपर साना तथा ठूला गरेर एक सय ५० होटल छन् भने ५० भन्दा बढी रेस्टुरेन्ट छन्। सौराहामा चितवन राष्ट्रिय निकुञ्जमा जिप सफारीका साथै डुंगा सयर, हात्ती सफारीका लागि पर्यटक आउने गरेका छन्।

चितवन राष्ट्रिय निकुञ्जका अनुसार गत वर्ष निकुञ्जमा स्वदेशी तथा विदेशी गरी करिब तीन लाख पर्यटकले भ्रमण गरेका छन्।